काठमाडौँ । रुस–युक्रेन युद्ध चार वर्षभन्दा बढी समयदेखि जारी छ । यसैबीच रुसका राष्ट्रपति भ्लादिमिर पुटिनले फेरि एकपटक पश्चिमा मुलुकहरूलाई कठोर चेतावनी दिएका छन् । पुटिनले स्पष्ट शब्दमा भनेका छन् कि यदि नाटो वा पश्चिमी मुलुकहरूले आफ्नो सेना युक्रेनमा तैनाथ गरे भने रुसले आक्रमण अझै तीव्र रूपमा जारी राख्नेछ ।
रुसी राजधानी मस्कोमा आयोजित पत्रकार सम्मेलनमा पुटिनले भने ‘युक्रेनलाई सहयोग गर्ने नाममा पश्चिमी सेनाको प्रत्यक्ष उपस्थितिले युद्धलाई अझ भयावह बनाउनेछ । हामी त्यसलाई आक्रमणको प्रत्यक्ष संकेतका रूपमा लिनेछौँ ।’ उनका अनुसार अहिले नै पश्चिमी मुलुकहरूले युक्रेनलाई हतियार, प्राविधिक सहयोग र वित्तीय सहायता दिइरहेकाले युद्ध लाम्बद्ध भएको छ ।
पश्चिमा शक्तिहरू विशेषतः अमेरिका र युरोपेली मुलुकहरूले, रुसको आक्रमण रोक्न युक्रेनलाई निरन्तर सहयोग गर्दै आएका छन् । तर, प्रत्यक्ष रूपमा सेना पठाउनेबारे कुनै ठोस निर्णय नभए पनि नाटोभित्र यसबारे छलफल भइरहेको खबर बाहिर आएका यही सम्भावनाप्रति पुटिन आक्रोशित बनेको अन्तराष्ट्रीय संचार माध्यमहरुले जनाएका छन् ।
पुटिनले नाटोमा सदस्य रहेका देशहरूलाई चेतावनी दिंदै भने, ‘युक्रेन हाम्रो सुरक्षा हितको प्रत्यक्ष सवाल हो। हाम्रो सीमामा विदेशी सेनाको उपस्थिति कहिल्यै स्वीकार्य हुँदैन । यदि उनीहरूले यस्तो साहस गरे भने त्यसको परिणाम उनीहरूले नै भोग्नुपर्नेछ ।’
विश्लेषकहरूले पुटिनको यो चेतावनीलाई पश्चिमप्रति दबाब सिर्जना गर्ने रणनीति भएको बताएका छन् । उनका अनुसार रुस अहिले पनि युक्रेनका पूर्वी क्षेत्रमा व्यापक सैन्य कारबाहीमा सक्रिय छ । तर, युद्ध लामो समयसम्म खिचिनु र पश्चिमी सहयोग बढ्दै जानुका कारण रुस थप असहज स्थितिमा पुगेको देखिन्छ । यस्तो अवस्थामा पुटिनले पश्चिमी मुलुकहरूलाई डर देखाएर उनीहरूको प्रत्यक्ष हस्तक्षेप रोकिने अपेक्षा राखेका हुन् ।
यता, युक्रेनका राष्ट्रपति भोलोदिमिर जेलेन्स्कीले भने पश्चिमी सहयोग अपरिहार्य रहेको दाबी गरेका छन् । उनका अनुसार ‘हामी मात्र रुसी आक्रमण रोक्न सक्दैनौँ। अन्तर्राष्ट्रिय सहयोगबिनाको संघर्षले हाम्रो सार्वभौमसत्ता नै खतरामा पार्नेछ ।’ जेलेन्स्कीले बारम्बार नाटो सदस्य मुलुकहरूसँग प्रत्यक्ष सुरक्षा ग्यारेन्टी माग्दै आएका छन् ।
रुस-युक्रेन युद्ध सुरु भएको २०२२ फेब्रुअरीदेखि अहिलेसम्म दुवै देशका सीमाक्षेत्रबाट लाखौँ मानिस विस्थापित भएका छन् भने दुवै पक्षका हजारौँ सैनिक मारिएका वा घाइते भएका छन् । युद्ध कै कारण दुईटै देशतर्फका नागरिक पूर्वाधार, ऊर्जा संरचना र आवासीय क्षेत्रहरूमा व्यापक क्षति पुगेको छ ।
केही समय अगाडी मात्रै फ्रान्सका राष्ट्रपति इमानुएल म्याक्रोनले पनि युक्रेनमा प्रत्यक्ष सेना पठाउने सम्भावनाबारे सार्वजनिक टिप्पणी गरेका थिए । यद्यपि, जर्मनी, अमेरिका लगायतका मुलुकहरूले तत्काल यस्तो कदम चाल्ने सम्भावना नरहेको बताएका छन् । पुटिनको भर्खरै सार्वजनिक भएको ताजा चेतावनीले भने युद्धको भविष्य झन् जटिल बन्दै गएको सन्देश दिएको छ ।
स्रोत : अन्तराष्ट्रीय संचार माध्यम
