बार्सिलोना । युरोप भ्रमणमा रहेका नेपाल विद्युत प्राधिकरणका पूर्वकार्यकारी निर्देशक कुलमान घिसिङले मुलुकको समग्र रुपान्तरणका लागि सही राजनीतिक नेतृत्व अपरिहार्य भएको बताएका छन्।
एनआरएनए क्षेत्रीय समिति कोष्टाव्लाङ्का र नेपाल समाज एशोसिएसन कोष्टाव्लाङ्काले संयुक्त रूपमा आयोजना गरेको कार्यक्रममा बोल्दै उनले राजनीतिक सुधार र प्रभावकारी नेतृत्वबिनै नेपालले आर्थिक परिवर्तन हासिल गर्न नसक्ने बताए।
घिसिङले विदेशमा रहेका नेपालीलाई नेपाल फर्काउन र छिटो आर्थिक विकास गर्न नीति तथा नेतृत्वमा व्यापक सुधार आवश्यक रहेको उल्लेख गर्दै भने, “बत्तीको उज्यालो मात्र पुग्दैन, सुशासन, रोजगारी र समृद्धिका लागि देशका सबै क्षेत्रमा उज्यालो छर्नुपर्छ।”
आफ्नो कार्यकालमा विद्युत उत्पादन पाँच गुणा बढाएर झन्डै ४ हजार मेगावाट पुर्याएको स्मरण गर्दै उनले प्राधिकरणलाई आर्थिक रूपमा सबल बनाउन सफल भएको बताए। चार महिनाअघि बर्खास्ती भएको प्रसङ्गलाई व्यंग्य गर्दै उनले भने, “सरकारले त्यस्तो नगरेको भए म आज तपाईंहरूसँग भेटघाट गर्न पाउँदिनथेँ।”
उज्यालो नेपाल अभियानमार्फत अँध्यारो हटाई आशा जगाउने उद्देश्य रहेको बताउँदै घिसिङले प्रवासी नेपालीको सीप, अनुभव र लगानीलाई नेपालको विकासमा जोड्नुपर्नेमा जोड दिए। संसारभर ५० लाखभन्दा बढी नेपालीको योगदान मुलुकको ठूलो सम्पत्ति भएको उनको भनाइ छ।
