काठमाडौं। नेकपा एमालेका उपमहासचिव पृथ्वीसुब्बा गुरुङले पार्टीभित्र संघीयताविरोधी तत्वहरु पनि भएको बताएका छन् । लोकतान्त्रिक आदिवासी जनजाति महासंघको केन्द्रीय पदाधिकारीको विस्तारित बैठकलाई सम्बोधन गर्दै उनले पार्टीभित्रै खुलमखुला प्रदेश सरकार चाहिँदैन भन्नेहरू रहेको बताएका हुन ।
उपमहासचिव गुरुङले भने,‘हाम्रै पार्टीभित्र पनि संघीयताविरोधी छन्, खुलमखुला प्रदेश सरकार चाहिँदैन भन्नेहरू पनि छन् । जातीय, भाषिक र सांस्कृतिक समस्या सही ढङ्गले सम्बोधन गर्न सकिएन भने द्वन्द्व हुन्छ, सबै जातजातिलाई राज्यको अनुभूति गराउँदा द्वन्द्व हुँदैन, शान्ति कायम हुन्छ, उनीहरूमा अपनत्वबोध हुन्छ । समुदायमा कुनै एक जातिको मात्रै बाहुल्य भएको त काहीँ पनि छैन । त्यसकारण समावेशी संघीयता चाहिएको हो ।’
सञ्चारमन्त्रीसमेत रहेका गुरुङले नारामा मात्रै ‘समृद्ध नेपाल सुखी नेपाली’ भनेर नहुने भन्दै समृद्ध र सुखी नेपालीका लागि शान्ति, स्थिरता, संघीय ढाँचाको समावेशी राज्य, अधिकारको बाँडफाँट, उनीहरूको आफ्नो प्रतिनिधित्व आवश्यक रहेको बताए ।
उनले थपे, ‘समाजमा भाषिक र जातीय समुदायबीच असमानता छ । सबैभन्दा बढी वर्गीय असमानता छ । बहुसंस्कृति मान्ने मुलुकमा समतामूलक समाज निर्माणका लागि संघीयता चाहिएको हो । सबैलाई धार्मिक समानता हुनुपर्छ, कुनै एउटा धर्मको पृष्ठपोषण गर्दा धार्मिक युद्ध हुन्छ ।’
संघीय व्यवस्थाअनुसार प्रदेश र स्थानीय तहको निर्वाचन नभए विद्रोह हुने उनको भनाइ छ । उपमहासचिव गुरुङले संघीय प्रणालीलाई व्यवस्थित बनाउन र विश्वास जगाउने गरी राजनीतिमा लाग्नुपर्ने बताए ।
