काठमाडौं। रास्वपाका सांसदहरू आज पनि नीलो रिबन र कालो ड्रेस लगाएर संसद् भवन पुगेका छन् ।
भिजिट भिसा प्रकरणमा गृहमन्त्री रमेश लेखकको राजीनामा र छानबिन समितिको अडान कायमै राख्दै आफूहरूले आज पनि कालो पोशाक र नीलो रिबन लगाएर आएको प्रवक्ता मनिष झाले बताए । मानव तस्करीविरुद्धको अभियानलाई विश्वव्यापी रूपमा ‘निलो रिबन’ को प्रतीकले जनाउने भन्दै विरोधमा नीलो रिबन लगाएर गएको हो । अस्ति पनि नीलो रिबन लगाएर रास्वपा सांसदहरू सदन पुग्दा कांग्रेसका प्रमुख सचेतक श्याम घिमिरेले आपत्ति जनाउँदै बैठकबाट निष्कासन गर्नसमेत माग गरेका थिए ।
उनले भने, ‘हामी २२ दिनदेखि आन्दोलनरत छौँ । मानव तस्करीको विरोधस्वरुप निलो रिबन र कालो ड्रेस लगाएर आएका हौँ ।’ आज प्रतिनिधिसभामा प्रधानमन्त्रीसँग प्रश्नोत्तर कार्यक्रम छ । सभामुखले आज सदन अवरोध नगर्न गरेको आग्रह रास्वपाले अस्वीकार गरिसकेको छ ।
नीलो रङदेखि चिढिएकाहरूलाई आजको कालो र नीलो रङ सन्देश भएको रास्वपा संसदीय दलको उपनेता विराजभक्त श्रेष्ठले बताए । उनले भनेका छन्, ‘यो केवल रङ होइन, नागरिकको आवाज हो । मानव तस्करविरुद्धको आन्दोलन जारी छ ।’
रास्वपाको वेल घेराउ र नाराबाजी बाबजुद सभामुखले सदनको कारबाही अघि बढाइरहेका छन् ।
