काठमाडौं। गृहमन्त्री रमेश लेखक मुछिएको भिजिट भिसा प्रकरणमा छानबिन प्रक्रिया अगाडि बढाउन सत्तापक्ष तयार भएको छ।
संसद् भवन नयाँ वानेश्वरमा शुक्रबार भएको प्रमुख प्रतिपक्षी दल नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ र नेपाली कांग्रेसका उपसभापति पूर्णबहादुर खड्का,नेता ज्ञानेन्द्रबहादुर कार्की र प्रमुख सचेतक श्यामकुमार घिमिरेबिच भएको छलफलमा कांग्रेस नेताहरू छानबिन प्रक्रिया अगाडि बढाउन सहमत देखिएका हुन् ।
बैठकपछि सञ्चारकर्मीहरूसँग कुरा गर्दै अध्यक्ष प्रचण्डले कांग्रेस नेताहरू छानबिन प्रक्रिया अगाडि बढाउन सकारात्मक देखिएको जानकारी दिएका हुन् ।
उनले भने,‘भिजिट भिसा प्रकरणमा नेपाली कांग्रेसका नेताहरू छानबिन प्रक्रिया अगाडि बढाउन सकारात्मक देखिनु भएको छ,’
‘न्यायिक समिति बनाउने कि संसदीय समिति बनाउने भन्ने विषय टुङ्गिएको छैन । अख्तियार दुरुपयोग अनुसन्धान आयोगले छानबिन गरिरहेकाले अदालतमा मुद्दा दायर गर्ने बेलासम्म कुरौँ भन्ने कुरा पनि उहाँहरूको छ ।’प्रचण्डले सञ्चारकर्मीहरूसँग भने।
प्रचण्डले प्रतिपक्षी दलहरूले छानबिनको भरपर्दो सरकारको प्रतिबद्धता आएमा आफूहरू संसद्को अवरोध हटाउन सकारात्मक रहेको जानकारी सत्तापक्षलाई दिएको पनि जानकारी दिए ।
