काठमाडौं । नेकपा माओवादी केन्द्रका अध्यक्ष प्रचण्डले संविधानलाई चुनौती दिँदै देशलाई वंशवादतिर फर्काउने प्रयास भइरहेको भन्दै माओवादीले जिम्मेवार ढंगले त्यसको प्रतिकार गर्ने बताएका छन्। धरानमा आयोजित किराँती राष्ट्रिय मुक्ति मोर्चा र लिम्बूवान राष्ट्रिय मुक्ति मोर्चा नेपालको संयुक्त राष्ट्रिय सम्मेलनमा प्रचण्डले राप्रपाका सांसदहरूले यही संविधानअनुसार सदनभित्र बसेर तलब, भत्ता र सबै सुविधा लिएर संविधानकै विरोध गरेको भन्दै आलोचना गरे।
‘देशमा संघीय लोकतान्त्रिक गणतन्त्र छ। त्यसैले सदनभित्र बसेर यही संविधानअनुसार तलब, भत्ता र सुविधा लिने अनि त्यसैको विरोध गर्ने अधिकार पाउनु भएको हो। तपाईंहरूलाई हिजोको राजतन्त्रमा त्यो अधिकार थियो? जनताले बिर्सेका छैनन्, न त बिर्सनेछन्,’ प्रचण्डको भनाइ थियो। प्रचण्डले राप्रपाका सांसदहरूलाई ‘नक्कली राजाको कुरा नगर्नुहोस्’ भन्दै ‘रियल राजा’ (वीरेन्द्र) को वंशनाश भएको घटनाको छानबिन गर्ने आँट छ? भनेर प्रश्न गरेका छन्।
उनको भनाइ जस्ताको तस्तै-
दरबारभित्रको भयानक सिंगो परिवारको हत्याको छानबिन गर्ने आँट किन गर्नुभएन । मैले गणतन्त्रको पहिलो प्रधानमन्त्रीको हैसियतले प्रस्ताव गरेको थिएँ । दरबारको भयानक हत्याको जिम्मेवार को हो ? जनताको मनमनमा सबैलाई क्लियर छ, यही हो भन्ने । आयोगकै छानबिन नभएकाले भन्न गार्हो छ । सही छानबिन गर्ने हो भने हाम्रै आँखा अगाडि छन् । प्रमाणित गर्न केही गार्हो छैन, जनताले बुझ्नुपर्यो फेरि एकपटक जाग्नुपर्यो । आन्दोलन गर्छौं भन्ने राजावादी साथीहरूलाई दरबार हत्याकाण्डको छानबिन गरौं भन्ने प्रस्ताव ल्याउन आँट गर्नुहुन्छ ? तपाईँ बडो राजा चाहिन्छ भन्नेहरूलाई अरुभन्दा सालिन राजा भनेर जनताले माया गर्ने राजाको निर्मम ढंगले हत्या हुँदा त्यसको छानबिन गरौं भन्ने आँट छ ? अनि के को राजाको कुरा गर्नुहुन्छ ? अहिले तपाईँहरूले भन्ने गरेको राजा राजा होइनन् । नक्कली राजा हुन् । नक्कली राजालाई बोक्नुभएको छ ? रियल राजाका हत्यारालाई छानबिन गरौं किन भनिरहनुभएको छैन । तपाईँहरू पनि नक्कली कुरा गरिरहनुभएको छ ।
राजावादीको योजना चैत १५ मै विफल बनाएको भन्दै जेठ १५ देखि अर्को आन्दोलनको दुस्साहस नगर्न चेतावनीसमेत दिए ।
