विराटनगर। मोरङको विराटनगरस्थित एक होटलमा तीन जना प्रहरी निरीक्षकबीच भएको कुटाकुटको घटना सामाजिक सञ्जालमा भाइरल भएको छ । प्रहरीमाथि प्रश्न उठाउने उक्त घटना सार्वजनिक भएपछि प्रहरी संगठनभित्र कारबाहीको प्रक्रिया सुस्त भएको भन्दै झन् आलोचना सुरु भएको छ ।
स्रोतका अनुसार जिल्ला ट्राफिक कार्यालय मोरङका इन्चार्ज राजन लम्साल, जिल्ला घुमुवा कमाण्डर सरोज खनाल र रंगेली इलाका प्रहरी कार्यालयका इन्चार्ज सन्तोष खड्का बीच मदिरापानको क्रममा विवाद उत्पन्न भएको थियो । एउटै ब्याचका तीन इन्स्पेक्टरबीच बिल तिर्ने विषयलाई लिएर सुरु भएको भनाभन कुटाकुटमा परिणत भएको थियो ।
विवाद उत्कर्षमा पुग्दा होटलका कर्मचारीहरुले प्रहरीलाई खबर गरेका थिए । घटनास्थलमा पुगेका सुरक्षाकर्मीले हस्तक्षेप गर्न खोज्दा केही जवान र अधिकृत समेत अभद्र व्यवहारमा परेका थिए । घटनाका एक सहभागी निरीक्षक लम्साल अत्यधिक मदिरा सेवनपछि सडकमा बस्त्रविहीन अवस्थामा देखिएका थिए ।
उक्त घटना गुपचुप राख्ने प्रयास भए पनि शुक्रवार बेलुका भिडियो सार्वजनिक भएपछि आलोचना चुलिएको छ । प्रहरी महानिरीक्षक (आईजीपी) दीपक थापाले तत्काल अनुसन्धान र आवश्यक कारबाही गर्न निर्देशन दिएका छन् । तर घटना भएको समयमा मेडिकल परीक्षण नगरिएकाले कानुनी रूपमा प्रमाण जुटाउन कठिन भएको प्रहरी स्रोतले जनाएको छ ।
कोशी प्रदेश प्रहरी कार्यालयका निमित्त प्रमुख एसएसपी भीमबहादुर दाहाल र जिल्ला प्रहरी प्रमुख एसपी नारायण चिमौरियाले सुरुमा चासो नदिएको भन्दै उनीहरूप्रति पनि प्रश्न उठ्न थालेको छ । विशेष आरोप सरोज खनालमाथि लागेको छ, जसले जिल्लाभरका घुमुवा संकलनको जिम्मा लिएका कारण शक्तिशाली रूपमा चिनिन्छन् । यस्तै, सन्तोष खड्काले पनि राजनीतिक पहुँच प्रयोग गरी प्रभावशाली पद पाएको चर्चा छ ।
प्रहरी भित्रैको अनुशासन र जवाफदेहिता कायम राख्नुपर्ने बेलामा उच्च अधिकृतहरूको भूमिका कमजोर देखिएको भन्दै संगठनको छविमा आँच आउने खालका यस्ता घटनामा गम्भीर कारबाहीको माग उठ्न थालेको छ ।
