काठमाडौं । त्रिभुवन विश्वविद्यायको आंगिक क्याम्पसमध्ये मानविकी अध्यापन हुने सबैभन्दा ठूलो आर आर क्याम्पस स्ववियु निर्वाचन निर्विरोध सम्पन्न गरिएकोमा नेविसंघका सभापति उम्मेदवारले विमति जनाएका छन् ।
चैत ५ गते निर्धारित स्ववियु निर्वाचन विद्यार्थी संगठनहरुको विवादका कारण पटकपटक स्थगित भएको थियो । अदालतको आदेशपछि निर्वाचन सम्पन्न गर्नैपर्ने दबाब भएपछि क्याम्पसमा दर्ता भएका संगठनहरुको सहमतिमा निर्विरोध स्ववियु घोषणा गरिएको थियो ।
आरआर क्याम्पसको इतिहासमै पहिलोपटक भएको निर्विरोध निर्वाचन प्रक्रियाबाट अनेरास्वयुका लोकेश खड्का अध्यक्ष,अखिल क्रान्तिकारीका संगम लामा उपाध्यक्ष र नेविसंघका शैलेन्द्र उपाध्याय सचिव निर्वाचित भएका छन् ।
अन्य पद र सदस्य पनि सबै संगठनले निर्विरोध घोषणा गरेकोमा नेविसंघका अध्यक्ष उम्मेदवार विनोदराज जोशीले असहमति जनाएका हुन् । उनले स्ववियुमा सर्वसम्मति हुने हो भने मनोनयन फिर्ता लिने बेलामै हुनुपर्ने भन्दै अहिले भनिएको सर्वसम्मति अवैधानिक रहेको बताए ।
जोशीले यो सर्वसम्मत घोषणाको विरुद्ध सर्बोच्च अदालतमा जाने बताए । नेविसंघका नाममा सहमतिमा हस्ताक्षर गर्नेहरुमाथि कारवाही प्रक्रिया थालेको उनले बताए । नेविसंघ केन्द्रीय समितिले आरआर क्याम्पसमा नेविसंघको कुनै समिति नरहेको जानकारी गराउँदै यसअघिको समिति भंग गरेको छ ।
आरआर क्याम्पसमा २०७३ सालदेखि विद्यार्थी संगठनको विवादकै कारण निर्वाचन हुन सकेको थिएन । इतिहासदेखि सधैं अनेरास्ववियुले जित्दै आएको यो क्याम्पसमा यसपटक कुनै पनि संगठन जितप्रति विश्वस्त थिएनन् ।अखिल क्रान्तिकारी र नेविसंघका नेताहरुले चुनाव हुँदा एउटा सदस्य पनि जित्न सकिने अवस्था नरहेको भन्दै अनेरास्ववियुसँग मिलेर पदाधिकारीसहित सदस्य हात पार्न सहमति गरे । तर नेविसंघबाट सभापति उम्मेदवार बनेका जोशीलाई यो प्रक्रियामा बाइपास गरियो ।
अखिल क्रान्तिकारीका सभापति उम्मेदवार संगम लामा उपसभापति बन्न तयार भ तर नेविसंघका सभापति उम्मेदवार जोशीका प्रस्तावक जितेन्द्र तिमल्सिनाले शैलेन्द्र उपाध्यायलाई सचिव बनाए । यसमा नेविसंघका आरआरका नेताहरु अशोकसिंह विष्ट,अनुराग शाहलगायत संलग्न रहेका थिए ।
जोशी नेविसंघ अध्यक्ष दुजाङ शेर्पानिकट हुन् । हुन त जितेन्द्र,,अनुराग,अशोकसिंहहरु पनि संस्थापनकै हुन् । तर जोशीलाई उनीहरुले शुरुदेखि नै उम्मेदवार बनाउन चाहेका थिएनन् । यहि मेसोमा अखिलसँग मिलेर ठेगान लगाउन सफल भए ।
अशोक सिंह विष्ट गृहमन्त्री रमेश लेखकनिकट हुन् भने अनुराग प्रकाशशरण महतनिकट हुन् । निर्विरोध प्रक्रियामा सहभागी हुने र पदाधिकारी तथा सदस्य बस्नेहरुलाई अध्यक्ष दुजाङ शेर्पाले स्पष्टिकरण सोधेका छन् । निर्विरोध घोषित पदाधिकारी र सदस्यहरुलाई राजीनामा गर्न दबाब दिएपछि उनीहरु लुकीलुकी हिँडेका छन् ।
निर्वाचन समिति संयोजक महेश भट्टराई र यसअघि सबै संगठनका उम्मेदवारका प्रस्तावकहरुले प्रक्रिया मिलाएर हस्ताक्षर गरी सर्वसम्मत घोषणा गरेकाले निर्वाचन रद्द हुने सम्भावना भने नदेखिएको बताइन्छ ।
