लैंगिक हिंसा विरुद्ध १६ दिने अभियान जारी रहँदा महिला हिंसा विरुद्ध अन्तरक्रिया गरी महिलाहरुलाई कानुनी परामर्श दिइएको छ । न्यु लाइफ मिसन नेपालको आयोजनामा शनिबार भरतपुर महानगरपालिका–८ वनदेवी सल्यानी टोल विकास संस्थासँग सहकार्य गरी उक्त कार्यक्रमको आयोजना गरिएको हो ।महिला हिंसा विरुद्धको कार्यक्रमलाई बन्द कोठामा सिमित नराखी तल्लो तहमै गएर महिलाहरु बीच कार्यक्रम गरिएको नयाँ जीवन अभियान नेपालकी अध्यक्ष निशा सिंह परियारले बताइन् । महिलाहरुलाई हिंसा विरुद्ध लड्न कानुनी परामर्श समेत दिनेगरी टोलविकास संस्थासँग सहकार्य गरिएको उनले बताइन् ।
कार्यक्रममा अधिवक्ता मदन थापाले कानुनी परामर्श दिएका थिए । सामाजिक अभियान्ता विकास विश्वकर्माले हिंसाको प्रकार र हिंसाका कारणहरु बारे प्रशिक्षण दिएका थिए । नयाँ जीवन अभियान नेपालले यसअघि पनि टोल विकास संस्थासँग सहकार्य गरी कार्यक्रम गरेको थियो ।
