सुर्खेत । सुर्खेतमा आयोजित बहुविषयक अन्तर्राष्ट्रिय सम्मेलन–२०२६ ले बहुविषयगत सहकार्य, ज्ञान आदानप्रदान र अनुसन्धानको स्तर अभिवृद्धि गर्दै शैक्षिक तथा प्राविधिक क्षेत्रमा नयाँ सम्भावना उजागर गरेको निष्कर्ष निकालेको छ ।
आइतबार सम्पन्न समापन समारोहमा वक्ताहरूले सम्मेलनबाट प्राप्त निष्कर्षहरू कार्यान्वयन गरी शैक्षिक रूपान्तरणमा जोड दिनुपर्ने बताए । समारोहका प्रमुख अतिथि तथा मध्यपश्चिम विश्वविद्यालयका उपकुलपति प्रा. डा. ध्रुवकुमार गौतमले सम्मेलनमा उठेका विषयलाई व्यवहारमा उतार्न सबै पक्ष सक्रिय हुनुपर्ने बताए । सूचना प्रविधि र नवप्रवर्तनको तीव्र विकाससँगै शिक्षा प्रणालीमा आमूल परिवर्तन भइरहेको उल्लेख गर्दै उनले विश्वविद्यालयहरू समयानुकूल प्राविधिक, नीतिगत र प्राज्ञिक रूपमा सक्षम हुनुपर्नेमा जोड दिए ।
मध्यपश्चिम विश्वविद्यालयका रजिष्ट्रार प्रा. डा. शोभाखर कँडेलले अन्तर्राष्ट्रिय सम्मेलनले विश्वविद्यालयको प्रतिष्ठा उकास्न मद्दत गरेको बताए । ‘अन्तर्विषयगत सहकार्यद्वारा कृत्रिम बुद्धिमत्ता र डिजिटल रूपान्तरणको युगमा दीगो भविष्य निर्माण’ भन्ने नारासहित मध्यपश्चिम विश्वविद्यालय र भारतको विरला ग्लोबल विश्वविद्यालयको सहकार्यमा सम्मेलन आयोजना गरिएको थियो ।
सम्मेलनमा २१ देशका पाँच सयभन्दा बढी सहभागीको उपस्थिति रहेको आयोजकले जनाएको छ । ३५० भन्दा बढी अनुसन्धानपत्र प्रस्तुत गरिएको सम्मेलनमा विषयगत सत्र, प्यानल छलफल र अन्तरक्रियामार्फत डिजिटल रूपान्तरणका अवसर र चुनौतीमाथि व्यापक बहस भएको थियो ।
उद्यमशीलता र कर्णालीको सम्भावना विषयक प्यानलमा प्रदेशको आर्थिक विकास, जैविक विविधता, कृषि तथा वन उद्योगका अवसर र चुनौतीबारे छलफल गरिएको थियो । साथै, ब्रेन ड्रेनलाई ब्रेन गेनमा रूपान्तरण र प्रवासी समुदायको भूमिकाबारे भर्चुअल सत्रहरू पनि सम्पन्न भएका थिए ।
सम्मेलनका क्रममा नेपालका नौ विश्वविद्यालयका उपकुलपतिहरूबीच राउण्ड टेवल छलफल समेत भएको थियो । त्यसमा पोखरा, संस्कृत, सुदूरपश्चिम, पूर्वाञ्चल, काठमाडौं, गण्डकी र राजर्षि जनक विश्वविद्यालयका उपकुलपतिहरूको सहभागिता रहेको थियो ।
