काठमाण्डौ। प्रतिनिधिसभाका सभामुख डोलप्रसाद अर्यालले संसदीय रिपोर्टिङ गर्ने पत्रकारलाई आफ्ना गल्तीहरू औँल्याइदिन अनुरोध गरेका छन् । शुक्रबार आयोजित संसदीय रिपोर्टिङ गर्ने पत्रकारसँग अन्तरक्रिया कार्यक्रममा सभामुख अर्यालले सो अनुरोध गरेका हुन् ।
‘मेरो गल्ती भए सुझाव दिनुहोस्, म तुरुन्तै माफी माग्न सक्छु । तर, त्यस गल्तीमा नखेल्दिनुहोला’, उनले भने, ‘अहिले मलाई घाटा होला, तर कालान्तरमा संस्थालाई घाटा हुन्छ । मेरो मतलब विषय लुकाइदिनुस् भन्ने होइन, तर विषय पस्कँदा अलि विचार गर्दिनुहोला ।’ उनले आफू गरिमामय संस्थाको नेतृत्वमा भएकोले व्यक्तिकेन्द्रित नभई संस्थाकेन्द्रित भएर सुझाव दिनुपर्नेमा जोड दिए । उनले सभामुख पद आफ्ना लागि नयाँ भएको र सिक्नुपर्ने कुरा धेरै बाँकी रहेको पनि स्षप्ट पारे ।
साथै, उनले हरेकलाई सरकार भएको महसुस गर्ने गरी काम गर्नेसमेत प्रतिबद्धता व्यक्त गरे । ‘चप्पल लगाउने हरेकलाई जुत्ता लगाउने, साइकल चड्ने गाडी चड्ने बनाउन चाहान्छौँ’, उनले भने, ‘गिटीकुट्ने वा विनोद चौधरीले पनि मेरो सरकार छ भन्ने महसुस गरोस् । नेता भन्दैमा पेट लागेको, बुढो र जुत्ता छोडेर चप्पल लगाउने भन्ने नहोस् भन्ने हाम्रो सोचाइ हो । त्यसैले मलाई बुढो नबनाइदिनुहोस्, सुझाव दिनुहोस्, म तपाईंहरूसँगै रहेर काम गर्छु ।’
