काठमाडौं । आजको डिजिटल युगमा बालबालिकाहरूको दैनिकी मोबाइलको सानो स्क्रिनमा खुम्चिँदै गएको छ । तर, ललितपुरको जाउलाखेल मैदानमा भने दृश्य बेग्लै छ । यहाँ केही स–साना बालबालीकाका खुट्टाहरू बलसँगै दौडिरहेका भेटिन्छन् । तीनै बालबालिकालाई मोबाइलको लतबाट छुटाएर फुटबलको मैदानमा पसिना बगाउन प्रेरित गर्ने मुख्य व्यक्ति हुन पूर्वराष्ट्रिय गोलरक्षक तथा प्रशिक्षक उज्ज्वल मानन्धर । पूर्व गोलरक्षकसमेत रहेका मानन्धरले राष्ट्रिय महिला टोलीदेखि पुरुष तथा उमेर समूहका टिमसम्म काम गरिसकेका छन् ।
अहिले उनी जाउलाखेल क्लब सञ्चालित फुटबल एकेडेमीमार्फत नयाँ पुस्तालाई प्रशिक्षण दिइरहेका छन् । उनका अनुसार यो पहल केवल खेल सिकाउने मात्र नभई, फुटबलप्रति रुचि भएका बालबालिकालाई सही दिशा दिने उद्देश्यले सुरु गरिएको हो । ‘हामीले ग्रासरुटदेखि नै बच्चाहरूलाई समेटेर प्रशिक्षण सुरु गरेका छौं,’ मानन्धर भन्छन्, ‘राष्ट्रिय टोलीसँग काम गरिसकेका प्रशिक्षकहरू नै यहाँ आबद्ध हुनुहुन्छ ।’
उनीसँगै प्रशिक्षक किशोर केसी र सुनिल श्रेष्ठ पनि यस अभियानमा संलग्न छन् । उनीहरूको समन्वयमा उमेरअनुसार प्रशिक्षण विभाजन गरिएको छ । सानो समूह मानन्धर स्वयंले हेर्छन् भने माथिल्लो समूह अन्य प्रशिक्षकहरूले सम्हाल्छन् ।
बालबालिकासँग काम गर्दा आफूलाई विशेष सन्तुष्टि मिल्ने मानन्धर बताउँछन् । ‘उनीहरूको उत्साहले नै ऊर्जा दिन्छ,’ उनी भन्छन्, दिनभरका कुरा साटासाट गर्दै प्रशिक्षण गर्दा रमाइलो मात्र होइन, आत्मसन्तुष्टि पनि मिल्छ ।’
आफ्नो खेल जीवन सम्झिँदै उनी अहिलेका पुस्तालाई भाग्यमानी ठान्छन् । ‘हामी खेल्दाखेरि एउटा बुटका लागि संघर्ष गर्नुपथ्र्यो,’ उनी सम्झन्छन्, ‘कहिलेकाहीँ त प्लास्टिकको गोलो बनाएर बलको सट्टा खेल्थ्यौं । तर अहिलेको दृश्य फरक छ हरेक बच्चाको खुट्टामा बुट, शरीरमा जर्सी र हातमा बल छ ।’
हाल एकेडेमीमा करिब ६०–७० जना बालबालिका आबद्ध रहेको उनले बताए । उनले विद्यालय समयलाई ध्यानमा राख्दै सातामा पाँच दिन साँझ ४ बजेदेखि प्रशिक्षण सञ्चालन गरिन्छ भने आइतबार बिहान विशेष सत्र राखिने गरेको बताए ।
प्रशिक्षणलाई कडा अभ्यासभन्दा बढी रमाइलो र सिकाइको मिश्रण बनाइएको मानन्धर बताउँछन् । अभिभावकहरूका लागि पनि यो पहल उपयोगी सावित भएको छ । मोबाइलमा अत्यधिक समय बिताउने बालबालिकालाई मैदानमा ल्याएर सक्रिय बनाउने माध्यम बनेको छ यो एकेडेमी । ‘अभिभावकहरू भन्छन्, यहाँ आएपछि बच्चाहरूमा सकारात्मक परिवर्तन देखिएको छ,’ मानन्धर भन्छन् ।
मैदानमा दौडिने, पसिना बगाउने र साथीहरूसँग खेल्दै सिक्ने यी सबैले बालबालिकाको दैनिकीलाई स्वस्थ बनाएको छ । यही कारण, बालबालिकाहरू शनिबार र बिदाका दिनमा समेत प्रशिक्षण गर्न आग्रह गर्ने गरेका छन् ।
उज्ज्वल मानन्धर र उनका सहकर्मीहरूको प्रयास केवल खेलाडी उत्पादनमा सीमित छैन, उनीहरू अनुशासन, स्वास्थ्य र सकारात्मक जीवनशैलीको बीउ रोपिरहेका छन् । छायाँमा रहेर पनि नेपाली फुटबलको भविष्य निर्माणमा उनीहरूको योगदान गहिरो र अर्थपूर्ण देखिन्छ ।
