काठमाण्डौ। सुदूरपश्चिम प्रदेशमा माध्यमिक शिक्षा परीक्षा (एसईई)को तयारी अन्तिम चरणमा पुगेको छ । अर्को सातादेखि सुरु हुने एसईई परीक्षाका लागि नौवटै शिक्षा समन्वय इकाइमा प्रश्नपत्र पुर्याइएको छ । शिक्षा विकास निर्देशनालय सुदूरपश्चिमका अनुसार इकाइबाट परीक्षा केन्द्र पठाउनका लागि प्रश्नपत्र रुजु गर्ने काम भइरहेको छ ।
निर्देशनालयका सूचना अधिकारी प्रेमलाल हरिजनले यसवर्ष सुदूरपश्चिमबाट एसईई परीक्षामा ५३ हजार ९७३ विद्यार्थी सहभागी हुने जानकारी दिए । उनका अनुसार नियमिततर्फ ४० हजार ७१०, प्राविधिक धारका एक हजार ७७८ र ग्रेडवृद्धिमा ११ हजार ४८५ परीक्षार्थी रहेका छन् ।
सबैभन्दा बढी कैलालीमा १८ हजार २७८ परीक्षार्थी छन् । सबैभन्दा कम बाजुरामा २ हजार ४२६ परीक्षार्थी छन् । यस्तै, कञ्चनपुरमा १० हजार ८९८, बैतडीमा ४ हजार ५२९, अछाममा ४ हजार ४९१, दार्चुलामा ३ हजार ५६८, बझाङमा ३ हजार ४२१, डोटीमा ३ हजार ३१४ र डडेल्धुरामा ३ हजार ४८ परीक्षार्थी रहेका छन् ।
निर्देशनालयका सूचना अधिकारी हरिजनका अनुसार प्रदेशभर २२१ वटा परीक्षा केन्द्र निर्धारण गरिएको छ । २२१ केन्द्राध्यक्ष र ३७३ सहायक केन्द्राध्यक्ष तथा २ हजार ७२८ जना निरीक्षकलाई परीक्षामा परिचालन गर्ने तयारी रहेको हरिजनले बताए ।
यस्तै, प्रतिपरीक्षा केन्द्र १५ जनाका दरले ३ हजार ३१५ प्रहरी, ४६९ जना परीक्षा सहायक र १ हजार १०३ जना सहयोगी कर्मचारी खटाउने तयारी रहेको निर्देशनालयले जनाएको छ ।
