फाल्गुन २७,बाग्लुङ्ग। बागलुङको ढोरपाटनमा दादुरा संक्रमण देखिएपछि गाउँमा त्रास फैलिएको छ । ढोरपाटन नगरपालिका-७, ८ र ९ मा पाँच जनामा दादुरा संक्रमण पुष्टि भएको छ भने ७४ जनामा शंकास्पद लक्षण देखिएको छ ।
पछिल्लो समय बिरामी बढ्न थालेपछि बोबाङ स्वास्थ्य चौकी र बुर्तिबाङ अस्पतालमा २६ शय्याको आइसोलेसन निर्माण गरिएको प्रदेश जनस्वास्थ्य कार्यालय बागलुङका सूचना अधिकारी देवप्रकाश घिमिरेले जानकारी दिए । उनका अनुसार संक्रमित बिरामीको आइसोलेसनमा राखेर उपचार सुरु गरिएको छ ।
ढोरपाटनमा दादुरा संक्रमण देखिएपछि गाउँका स्थानीयमा त्रास फैलिएको बताउँदै घिमिरेले आवश्यक सचेतना अपनाउन सबैलाई आग्रह गरे । कसैमा शंकास्पद लक्षण देखा परे तत्काल स्वास्थ्य कार्यालयमा सम्पर्क गर्न अनुरोध गर्दै उनले संक्रमण रोक्न खोप अभियान सञ्चालनको तयारी गरिएको जानकारी दिए ।
उनका अनुसार पाँच जनामा दादुरा संक्रमण पुष्टि इसकेको छ भने १४ जनाको नमुना परीक्षणका लागि राष्ट्रिय स्वास्थ्य प्रयोगशाला टेकु काठमाडौंमा स्वाब पठाइएको छ ।
दशदेखि २० वर्ष उमेर समूहका व्यक्तिमा शंकास्पद लक्षण देखिएको घिमिरेले बताए । ८ फागुनमा गाउँका केही स्थानमा संक्रमणको लक्षण देखिएपछि स्वास्थ्यकर्मी गाउँमा पुगेर खोजतलास गर्नुका साथै जोखिम पहिचान, सञ्चार तथा स्वास्थ्य सचेतना र उपचार तथा निगरानी बढाइएको प्रदेश जनस्वास्थ्य कार्यालयका प्रमुख प्रवीण शर्माले जानकारी दिए ।
यस क्षेत्रमा रहेका छ हजार ७६३ जनालाई दादुराविरुद्धको खोप लगाइने उनले बताए । २९ फागुनदेखि आगामी चैत्र १ गतेसम्म दादुराविरुद्धको विशेष खोप अभियान सञ्चालन गरिने प्रमुख शर्माले बताइ । गाउँभरि संक्रमण फैलिएपछि यस क्षेत्रका विद्यालयसमेत बन्द गरिएको ढोरपाटन नगरपालिकाले जनाएको छ ।
