प्रधानमन्त्री केपी शर्मा ओलीले सहकारी ठगी प्रकरणमा राष्ट्रिय स्वतन्त्र पार्टी (रास्वपा)का सभापति रवि लामिछाने थुनामा परेको विषयमा सरकारलाई जोड्न नहुने बताएका छन् । उनले अदालतले गर्ने निर्णयमा रास्वपाले हस्ताक्षर अभियान चलाइरहेको पनि कटाक्ष गरे । उनी थुनामा पर्नुमा कुनै राजनीतिक प्रतिशोध नभई लामिछानेकै कर्मको फल भएको बताए ।
मंगलबार कैलालीमा रानी जमरा कुलरिया सिँचाइ आयोजनाको उद्घाटन गर्दै प्रधानमन्त्री ओलीले भने, ‘विभिन्न प्रकारका अपराध गर्यो अनि सरकारलाई गाली गर्यो । सरकार अदालत होइन, अदालतले थुन्छ कि छोड्छ सरकारको हातमा हुँदैन । ठगी गरेपछि अदालतले थुन्छ त हामी के गर्नु ! गर्ने बेलामा नचाहिने काम गर्ने, अनि पछि लौ प्रतिशोध ! के को प्रतिशोध ?’
उनले रविमाथि राजनीतिक प्रतिशोध भन्दै रास्वपाले चलाएको हस्ताक्षर अभियानमा तीन करोडभन्दा बढी पुग्ला भनेर समेत कटाक्ष गरे । ‘तथाकथित हस्ताक्षर क्याम्पेन, मलाई डर लागेको छ, तीन करोडभन्दा माथि हस्ताक्षर क्याम्पेन गयो भने, म उहाँहरूलाई सचेत गराउन चाहन्छु, हस्ताक्षर क्याम्पेन बढ्दै जाँदा तीन करोडभन्दा माथि नपुगोस् है, त्यसभित्रै राख्नुहोला । दुई चार जनालाई सही गरायो, घरमा गएर दनादन’, ओलीले भने, ‘मैले ल्याएको राजनीतिमा, के को प्रतिशोध ? के साँध्नु थियो ? असभ्य ढंगले बोलेको छ !’
उनले लामिछानेलाई आफूले उपप्रधानमन्त्री, गृहमन्त्री बनाएको बताए । राजनीतिमा पनि आफूले नै ल्याएको प्रधानमन्त्री ओलीले दाबी गरे । प्रधानमन्त्री ओलीले नयाँ दलहरू अर्काले लडेर, निर्वासनमा बसेर, जेलनेल भोगेर, पिटाइ–यातना, क्षति, बलिदान सहेर ल्याएको लोकतन्त्रमा ‘तर मारिरहेको’ टिप्पणी गरे ।
रास्वपा सभापति लामिछाने सहकारी ठगी प्रकरणमा पुर्पक्षका लागि भैरहवा कारागारमा छन् । उनीमाथि सरकारले राजनीतिक प्रतिशोध साँधेको भनेर रास्वपाले हस्ताक्षर अभियान चलाइरहेको छ । तर, नागरिक, पेशाकर्मी, कलाकर्मी लामिछानेको पक्षमा भनेर संकलन गरिरहेको हस्ताक्षर कीर्ते भएको प्रधानमन्त्री ओलीले टिप्पणी गरेका छन् ।
