राष्ट्रिय गौरवका योजनामा समावेश रानीजमरा कुलरिया सिँचाइ आयोजनाको प्रधानमन्त्री केपी शर्मा ओलीले उद्घाटन गरेका छन् । डेढ दशकदेखि कैलालीमा निर्माणाधीन अवस्थामा रहेको सिँचाइ आयोजनाको प्रधानमन्त्री केपी शर्मा ओलीले मंगलबार उद्घाटन गरेका हुन् ।
प्रधानमन्त्री ओलीमार्फत रानी, जमरा र कुलरिया तर्फको १४ हजार ३ सय हेक्टर सिँचाइ, ४.७१ मेगावाट क्षमताको जलविद्युत् तथा प्रसारण लाइनको उद्घाटन गरिएको हो । रानीजमरा कुलरिया सिँचाइ आयोजना सूचना अधिकारी नवीन पौड्यालका अनुसार हालसम्म आयोजनाको ७५ प्रतिशत काम मात्रै सम्पन्न भएको छ ।
‘सिंगो आयोजनाको काम ७५ प्रतिशत मात्रै सकिए पनि १४ हजार तीन सय हेक्टरमा सिँचाइ गर्न तथा जलविद्युत् र प्रसारण लाइन निर्माणको काम सकिएपछि आज उद्घाटन गरिएको हो,’ पौड्यालले भने, ‘बाँकी २५ प्रतिशत काम भने छ वर्षभित्र सम्पन्न गर्ने लक्ष्य छ ।’
