ऊर्जा, जलस्रोत तथा सिँचाइ मन्त्री दीपक खड्काको निरन्तरको हस्तक्षेपका कारण नेपाल विद्युत प्राधिकरण पछिल्लो समय निकै अप्ठ्यारोमा पर्दै गएको पाइएको छ । ठेक्कादेखि कर्मचारी सरुवा, विनियम संशोधनलगायत हरेक विषयमा अनावश्यक हस्तक्षेप गर्न खोज्ने मन्त्रीको शैलीले प्रबन्ध निर्देशक (एमडी) हितेन्द्रदेव शाक्यमात्र होइन,
प्राधिकरणकै स्वायत्तता समेत संकटमा परेको हो ।पछिल्लो समय मन्त्रीको अनावश्यक हस्तक्षेपले एमडी शाक्य तनावमा रहेको प्राधिकरण स्रोत बताउँछ ।तत्कालीन एमडी कुलमान घिसिङ प्राधिकरणबाट हटेलगत्तै चैत १३ गते बसेको नेपाल विद्युत प्राधिकरण सञ्चालक समितिको बैठकले ४ हजार ९६५ मेगावाटका ५४ जलविद्युत आयोजनाको विद्युत खरिद/बिक्री सम्झौता (पीपीए) खोल्ने निर्णय गर्यो । खड्का यो काम आफू मन्त्री भएलगत्तै गर्न चाहन्थे ।
नयाँ एमडीका रूपमा प्राधिकरणमा शाक्य आएपछि बोर्डले पीपीए गर्ने निर्णय गरे पनि तत्काल सूचना सार्वजनिक भएन । ती आयोजनाको पीपीए गर्न आतुर मन्त्री खड्काले ‘तत्काल सूचना निकाल्न’ एमडी शाक्यलाई बारम्बार निर्देशन दिइरहे ।
तर, शाक्यले अर्थ मन्त्रालयको सहमतिविना सूचना निकाल्न नमिल्ने भन्दै समय लिए । यही कारणले मन्त्री र एमडीबीचको सम्बन्धमा दरार आउन शुरू भएको हो ।
स्रोतका अनुसार मन्त्रीले शाक्यलाई ‘दलाल’सम्म भन्न भ्याएका थिए । यसबारे बालुवाटारसम्म कुरा पुगेको थियो । प्रधानमन्त्री ओलीले विषयलाई गम्भीर रूपमा लिएको भन्दै मन्त्री खड्कालाई कार्यशैली सुधार्न चेतावनी समेत दिएको स्रोतको दाबी छ ।
त्यसपछि वैशाख १३ गते एमडी शाक्य अन्ततः पीपीएको सूचना जारी गर्न बाध्य भए ।
उनले ३० दिनको समय राखेपछि मन्त्री खड्का झन चिढिए । खड्का तत्काल सम्झौतामा पुग्न चाहन्थे । मन्त्रालय स्रोतका अनुसार त्यसपछि पनि शाक्यमाथि मन्त्रीले दबाब दिन छाडेनन् ।
