यतिबेला रुपन्देही–क्षेत्र नं ३ उपचुनावले देशमा राजनीतिक माहोल बनाएको छ। कतिपय राजनीतिक दलहरूले आफ्ना उम्मेदवारहरू सार्वजनिक गरिसकेका बेला, रास्वपाले रुपन्देहीमा को उठाउला भनेर आम जनतादेखि स्वयं राजनीतिक दलहरूको समेत अर्जुन दृष्टि अहिले रास्वपामै केन्द्रित भएको छ।
रास्वपा सभापति रवि लामिछाने समेत पुर्पक्षका लागि थुनामा रहेकाले,रुपन्देहीको उपनिर्वाचनमा रास्वपाले कसलाई उम्मेदवारी दिन्छ भन्ने आम चासो रहेको आकलन गर्न सकिन्छ। यही बेला भने, डडेल्धुरामा कांग्रेस सभापति शेरबहादुर देउवाविरुद्ध उम्मेदवारी दिएर चर्चामा आएका सागर ढकाल उपचुनाव लड्न जुर्मुराएका छन्। रास्वपाको समर्थन लिएर उम्मेदवारी दिने उनले ताक पारेका छन्।
बीबीसीको ‘साझा सवाल’ मा तत्कालीन प्रधानमन्त्री देउवाको हप्की खाएर भाइरल भएका ढकाल २०७९ सालको आम निर्वाचनमा उनै देउवाविरुद्ध चुनाव नै लड्न डडेल्धुरा पुगेका थिए। चुनाव जित्न नसके पनि उनले नसोचेको भोट ल्याए। देउवाले २५,५३४ भोट ल्याएर चुनाव जित्दा ढकाल १३,०४२ मत ल्याएर दोस्रो भएका थिए।
त्यतिबेलानै हारको नमिठो स्वाद पाएका ढकाल यतिबेला फेरि रुपन्देहीबाट चुनावी सिँगोउरी खेल्न सिङ तिखारी रहेको बुझ्न सकिन्छ। अहिले सागर ढकाल रुपन्देही क्षेत्र नं ३ बाट उपचुनाव लड्ने भनेर प्रचार गर्दै हिँडिरहेका छन्। सकेसम्म रास्वपाको समर्थन लिएर उम्मेदवारी दिने र त्यो सफल नभए स्वतन्त्र भए पनि चुनाव लड्ने भनेर कम्मर कसिरहेका ढकालका निकटस्थहरू बताउँछन्।
हिजो मात्र पनि ढकालले आफ्नो फेसबुकमा लेखेको स्टाटसले पनि त्यस्तै संकेतको सुई त्यतै लागेको आकलन गर्न सकिन्छ। उनले “रुपन्देही क्षेत्र नं ३ मा नेपालको इतिहास रच्न तयार हुनुहुन्छ” भनेर स्टाटस लेखेका थिए। उनले चितवन–२ मा रविको ५४,१७६ र काठमाडौँमा बालेनको ६१,७६७ मत उल्लेख गर्दै, “अब रुपन्देही–३ मा करिब ९०,००० मत छन्, त्यसमा तपाईं–हामीले ६२,००० मत पार गर्नुपर्छ र नेपालको इतिहास रच्नुपर्छ। कांग्रेस–एमाले–माओवादी एउटै हुन्, यिनको राणा शासनको अन्त्य ०८४ मा गर्नको लागि सुरुआत यहाँबाट गर्नुपर्छ।” भनेर लेखेका थिए।
उनले यो स्टाटसमा चुनाव लड्ने भनेर सिधा घोषणा नगरे पनि स्पष्ट संकेत भने दिएका छन्। स्टाटसबाट उनी रवि, बालेनदेखि कुलमानका समर्थकसम्मलाई रिझाउने प्रयासमा रहेको बुझ्न सकिन्छ। बुझिए अनुसार, रास्वपाको समर्थनमा स्वतन्त्र उम्मेदवारी दिने र बालेन–कुलमानको नाम लिएर चुनाव जित्ने उनको रणनीति हो। तर, उनलाई रास्वपाले समर्थन गर्ने स्थिति अहिलेसम्म देखिएको छैन। साथै, रास्वपा स्रोतले ढकाललाई “बकवास प्रचार गर्दै हिँड्नु भएको” र “रास्वपाले ढकाललाई चुनाव उठाउने विषयमा कुनै छलफल नभएको” बताएको छ।
पार्टीले चुनावमा उम्मेदवारको खोजी भने गरिरहेको छ। अघिल्लो चुनावमा यस क्षेत्रमा रास्वपाले समानुपातिकतर्फ दोस्रो सर्वाधिक मत ल्याएको थियो। त्यसैले यसपटक भारी मतले चुनाव जित्ने गरी “कफन बाँधेर” होमिने रास्वपाको तयारी छ। सभापति रवि लामिछाने स्वयंले पार्टी पंक्तिलाई यो चुनाव जितेरै देखाउनुपर्ने सन्देश पठाइरहेको रास्वपा निकटस्थहरू दाबी गर्छन्। पार्टीले सकेसम्म स्थानीय र लोकप्रिय व्यक्तिको खोजी गरिरहेको बुझिएको छ।
तर,अहिलेसम्म कसैको नाम पनि चर्चामा नल्याइएकोले, रास्वपा निकटस्थ नेताहरूका अनुसार उम्मेदवारी घोषणा ठूलै ‘सरप्राइज’ हुन सक्ने दाबी छ। रवि लामिछानेलाई जेल हालेपछि उनीप्रति जनसहानुभूति बढेको हुँदा पार्टीको भोट उल्लेखनीय रूपमा बढ्न सक्ने अनुमान स्वतन्त्र विश्लेषकहरूको तर्क छ। तर,रास्वपाले कसलाई उठाउनेछ भन्ने जनमानसको चासोको विषय बन्दै गएको छ।
रुपन्देही क्षेत्र नं ३ का जनता तथा समग्र नेपालको जनमानसको चासोको विषय अहिले यही उपनिर्वाचन बनेको छ। तर सागर ढकाल भने रास्वपाका नेताहरूसँग सामीप्यता बढाउने नकाम कोसिसमा रहेको बुझ्न सकिन्छ। उनको चुनाव प्रतिको हुटहुटीले चुनाव लड्ने छाँटकाँट पक्का देखिन्छ, तर रास्वपाको आन्तरिक रणनीति भने सागर ढकाललाई “हिस्स बुढी हरिया दाँत” बनाउने जस्तो रहेको विज्ञहरू बताउँछन्।
