तिनकुने घटनापछि हराएका भनिएका रविन्द्र मिश्र रविको पक्षमा खुलेरै लागेका छन्। तिनकुने घटनामा कमाण्डर दुर्गा प्रसाईसँग मिलेर राजा फर्काउने अभियानमा ताण्डव मच्चाई प्रसाईसँगै जेल परेका मिश्र जिम्मा–जमानीमा छुटेपछि एकाएक हराएजस्तै भए र चर्चाको विषय बने । त्यसपछि,आफ्ना वकिलहरूलाई ५०/५० हजार जरिवाना तिराएर पुनः आफैं अदालतमा उपस्थित भई ३ लाख धरौटीमा छुटेका राप्रपाका वरिष्ठ उपाध्यक्ष रविन्द्र मिश्र अहिले फेरि चर्चामा आएका छन्।
रवि लामिछानेले कारागारबाट असार ७ मा जारी गरेका केही महत्वपूर्ण बुँदाहरूलाई मिश्रले उद्धृत गर्दै तिनलाई राजावादी एजेन्डासँग मिल्दोजुल्दो रहेको इशारा गरेका छन्। ‘रवि लामिछानेले कारागारबाट लेखेको पत्रमा धेरैले ध्यान नपुगेका चार महत्वपूर्ण बुँदाहरू’ भन्दै उनले रविको पत्रमा गरिएको ‘गत ३६ वर्षको कटु आलोचना’ सन् २०४६ सालपछिको नेपालको अवस्थालाई इंगित गरेको दाबी गरेका छन्।
उनले,दोस्रो बुँदामा नेपालको निर्वाचन प्रणालीमाथि गरिएको आलोचनालाई उदाहरण दिँदै ‘प्रत्यक्ष निर्वाचित कार्यकारी’ को कुरा गरिएको बताउँदै रविले ‘प्रत्यक्ष निर्वाचित राष्ट्रपति’ भनेका होइनन् भनेर स्पष्टिकरण दिएका छन्।
त्यस्तै, रविको ‘प्रदेशसभा खारेजी’ सम्बन्धी अभिव्यक्तिलाई उनले नेपालको वर्तमान सन्दर्भमा ‘संघीयता खारेजी हो भनेर बुझ्नुपर्छ’ भन्ने धारणा व्यक्त गरेका छन्। त्यसैगरी, ‘संविधान संशोधन होइन, पुनर्लेखन हुनुपर्छ’ भन्ने रविको अभिव्यक्तिलाई उनले अर्थपूर्ण र गहन ठहर गरेका छन्। उनले अन्त्यमा यी सबै बुँदाहरूको विश्लेषण पाठकमै छाडेको उल्लेख गरेका छन्।
मिश्रको यस किसिमको अभिव्यक्तिले नेपाली राजनीतिक वृत्तमा व्यापक हलचल ल्याएको छ। उनले रवि लामिछानेलाई कानूनी प्रक्रियामा अनावश्यक पीडा दिइएको र राज्य प्रतिशोधपूर्ण भएको कुरा पहिलेदेखि नै भन्दै आएको प्रस्ट पारेका छन्।
यसै सन्दर्भमा रास्वपाका सह–कोषाध्यक्ष दीपक बोहोराले रविको उक्त स्टाटस सेयर गरेका छन्। उनले मिश्रका कुनै पनि टिप्पणीलाई खण्डन गर्ने प्रयास नगरेको प्रस्ट देखिन्छ। बरु, बोहोराले लेखेका छन्,’रविन्द्र दाइ, राजनीतिक मुद्दामा छलफल, बहस हुँदै जान्छ। जनस्तरले पनि अझै खुला छलफल गरुन्। छलफल, बहसले ढिलो–चाँडो निष्कर्षमा पुर्याउन मद्दत गर्छ। अभियानप्रतिको ऐक्यवद्धताका लागि आभारी छौं।’ भन्दै धन्यवाद समेत दिएका छन्।
तर, रास्वपाकै केन्द्रीय सदस्य गणेश कार्की भने मिश्रको स्टाटसमै गएर— ‘तपाईंको मार्ग परिवर्तनले नै वैकल्पिक आन्दोलनले निकै दुःख पायो। तपाईं हुँदाहुँदै अब तपाईंलाई नै बिर्सेर अर्को रविन्द्र मिश्र बन्ला र सर?’ भन्ने कटाक्षपूर्ण टिप्पणी गरेका छन्।
रविन्द्र मिश्रको यस स्टाटसले तहल्का पिटिरहेका बेला राप्रपाले रास्वपाको समर्थन गरेजस्तो गरेर सहानुभूति बटुल्ने प्रयास गरिरहेको त होइन भन्ने चर्चा राजनीतिक विश्लेषकहरूबीच चल्न थालेको छ। त्यस्तै, राप्रपाले रास्वपालाई फकाउन खोजेको र सक्रिय रास्वपाको सहानुभूतिमा ८४ नम्बर क्षेत्रबाट भारी मत ल्याउने रणनीति बनाइरहेको अड्कल पनि गर्न थालिएको छ।
