सिरहा। डाँका र संगठित अपराधमा संलग्न रही लामो समयदेखि फरार रहेका सुजन विक उर्फ सुजेन्द्र लोहनीलाई प्रहरीले सिरहा-भारत सीमाबाट पक्राउ गरेको छ।
उदयपुर त्रियुगा नगरपालिका–१२ घर भएका ३० वर्षीय लोहनी भारतमा लुकिछिपी बसिरहेका थिए। प्रहरीलाई प्राप्त विशेष सूचनाका आधारमा जिल्ला प्रहरी कार्यालय सिरहाबाट खटिएको टोलीले असार १२ गते बिहान करिब १ बजेतिर सिरहा नगरपालिका–१७, खैरटोका नजिकैबाट उनलाई नियन्त्रणमा लिएको हो।
लोहनी २०७९ फागुन १० गते मिर्चैया नगरपालिका-३ स्थित बताहा पुल नजिक भएको डाँका घटनामा संलग्न थिए। सो दिन ग्लोबल आइएमई बैंक कल्याणपुर शाखाका कर्मचारीले बैंकबाट झिकेको नौ लाख रुपैयाँ लिएर कार्यालयतर्फ जाँदै गर्दा मोटरसाइकलमा आएका चार जनाको समूहले कर्मचारी र सुरक्षामा खटिएका प्रहरी जवान नितेश खवासमाथि आक्रमण गर्दै रकम लुटेका थिए।
डाँकाहरूले निलो र रातो रंगका मोटरसाइकल चढेर आएका थिए र हतियार देखाई कुटपिट गर्दै पैसा लुटेर फरार भएका थिए। तीमध्ये एक प्रमुख आरोपी लोहनीलाई अहिले जिल्ला प्रहरी कार्यालय सिरहा मार्फत सिरहा जिल्ला अदालतमा पेस गरिएको छ।
प्रहरीका अनुसार घटनासँग जोडिएका अन्य फरार प्रतिवादीहरूको खोजी कार्य जारी छ।
