काठमाडौं। प्रधानमन्त्री केपी शर्मा ओलीले नेकपा विभाजनपछि एमालेलाई सिध्याउने षड्यन्त्र भएको भए पनि सही नेतृत्वकै कारणले फेरि पहिलेकै अवस्थामा फर्काउन सफल भएको बताएका छन् ।
राष्ट्रिय युवा संघ नेपाल केन्द्रीय कमिटीको दोस्रो पूर्ण बैठकलाई सम्बोधन गर्दै उनले सही विचार र नीतिकै कारणले विभाजनपछि पनि एमाले पहिलेकै अवस्थामा आएको जिकिर गरे ।
उनले भने, ‘यो कुरा युवाहरूले बुझ्न जरुरी छ । अर्थविनाको युवा भनेर उचाल्ने कुरा छ । सबै ठाउँमा चाहिन्छ, युवा नै पिलर हुन् । परिवर्तन र निर्माणका, तर जहाँ पनि युवामात्रै भनेर हुँदैन । युवाले कुन तहसम्म कसरी गर्छ र युवाले पनि विश्वास गर्नुपर्ने, सिक्नुपर्ने छाडेर हिँड्ने हो भने राम्रो हुँदैन ।’
अध्यक्ष ओलीले म नै युवा हुँ, अरू केही होइन भनेर हिँड्ने हो भने क्याम्पस जाँदा पनि प्रोफेसरहरूसँग पढ्न मन नलाग्ने जिकिर गरे ।
उनले थपे, ‘हामी अन्याय नगर्ने, नसहने हुनुपर्छ, आफ्नो निम्ति होस् वा समाजको निम्ति होस् । आफ्नो देशका निम्ति होस् । त्यो कुरा हामीले बुझ्नुपर्छ ।’
उनले पार्टीका नेता कार्यकर्तालाई आफू पनि अन्याय नगर्न र नसहन पनि निर्देशन दिए ।
