काठमाडाैं । भारतले पाकिस्तानविरुद्ध थालेको सैन्य अभियान ‘अप्रेशन सिन्दूर’ को विषयमा नेकपा माओवादी केन्द्रभित्र मतभेद देखिएको छ। पार्टीका महासचिव देव गुरुङ र उपमहासचिव जनार्दन शर्माले यसबारे सार्वजनिक रूपमा बाझिने अभिव्यक्ति दिएका छन्।
उपमहासचिव शर्माले सामाजिक सञ्जालमार्फत भारतको कदमको समर्थन गरेका छन्। उनले फेसबुकमा लेखेका छन्, “भारतले आतंकवाद विरुद्ध अपरेसन सिन्दूर सञ्चालन गरेको छ। आतंकवाद मानव सभ्यताको सबैभन्दा खराब कुरा हो। त्यसविरुद्ध लड्नु हरेक राष्ट्रको कर्तव्य हो। शान्ति र स्थिरताका लागि आपसी सहकार्य गर्दै आतंकवादलाई परास्त गर्न आवश्यक छ।”
तर, पार्टी महासचिव देव गुरुङले भने भारतको सैन्य कारबाहीलाई ‘न्यायोचित ठहर गर्न नसकिने’ भन्दै आलोचना गरेका छन्। उनले लेखेका छन्, “हिजो भारतले पाकिस्तानको विभिन्न क्षेत्रमा हवाईमार्फत क्षेप्यास्त्र आक्रमण गरेको छ। यो अत्यन्तै दु:खद विषय हो। भारतले आक्रमणको कारण काश्मीरको पहलगाममा भएको आतंकवादी आक्रमणलाई देखाएको छ। तर, पहलगामको आक्रमण कसले गरेको हो भन्ने स्वतन्त्र रूपमा पुष्टि भएको देखिँदैन।”
गुरुङले सैन्य कारबाही तत्काल बन्द गरी भारत–पाकिस्तानबीच संवाद हुनुपर्नेमा जोड दिएका छन्। साथै, पहलगाम घटनाबारे अन्तर्राष्ट्रिय कमिसन गठन गरी छानबिन गर्नुपर्ने माग पनि गरेका छन्।
“भारत र पाकिस्तान दुवै हाम्रो छिमेकी राष्ट्र हुन्। छिमेकीबीचको द्वन्द्वबाट नेपाल पनि प्रत्यक्ष वा अप्रत्यक्ष रूपमा प्रभावित हुन्छ। यस्तो संवेदनशील अवस्थामा नेपाल मौन बस्न मिल्दैन,” उनले लेखेका छन्।
यद्यपि, माओवादी केन्द्रले यसबारे औपचारिक धारणा सार्वजनिक गरेको छैन। पार्टी उपाध्यक्ष तथा प्रवक्ता अग्निप्रसाद सापकोटाले नेपाल प्रेससँग कुरा गर्दै, “पार्टीभित्र छलफल गरेर व्यवस्थित ढंगले धारणा सार्वजनिक गरिने” जानकारी दिएका छन्।
भारतको सैन्य कदमको पक्ष र विपक्षमा रहेका माओवादी नेताहरूको सार्वजनिक अभिव्यक्तिले पार्टीभित्र गम्भीर अन्तरविरोध देखिएको संकेत गरेको छ। यस्तो अवस्थामा माओवादी केन्द्रको औपचारिक र एकीकृत धारणा सार्वजनिक हुने प्रतिक्षामा सबैको नजर रहेको छ।
