ललितपुर, वैशाख २५ — प्रधानमन्त्री केपी शर्मा ओलीले देशमा निराशा फैलाउने तत्वहरूलाई लक्षित गर्दै ती “पुरातनवादी र असहिष्णु” सोच बोकेको समूह भएको आरोप लगाएका छन्। उनले लोकतान्त्रिक प्रणालीबाट सत्ता प्राप्त गर्ने सम्भावना नदेखेका कारण केही तत्व ‘देशमा केही भएन’ भन्ने मिसनमा लागिएको टिप्पणी गरेका हुन्।
राजधानीमा आयोजित एक कार्यक्रममा बोल्दै ओलीले ती तत्वहरू विगतमा दुई सय पचास वर्ष शासन गरिसकेको मानसिकता बोकेका भएको उल्लेख गरे। “यहाँ काम गर्ने मान्छे छैन, मान्छेहरू विदेश गइरहेका छन् भन्ने भाष्य बनाइएको छ,” उनले भने, “यो सोच पुरातनवादी तत्त्वहरूको हो, जसले लोकतान्त्रिक प्रणालीबाट आउन सक्दैनन् भनेर निराशा फैलाइरहेका छन्।”
प्रधानमन्त्री ओलीले अधिनायकवाद र तानाशाह प्रवृत्तिमा विश्वास गर्नेहरूले आशावादप्रति आक्रोश पोखिरहेको बताए। उनले फिल्म क्षेत्रमा पनि आशावादी विचार राख्ने कलाकारको चलचित्रलाई बहिष्कार गर्ने मानसिकता देखिएको उदाहरण दिँदै यस्तो प्रवृत्ति लोकतन्त्र पचाउन नसक्नेहरूकै हो भने।
उनका अनुसार लोकतन्त्र नै सबैभन्दा राम्रो प्रणाली हो र यसको कुनै विकल्प छैन। आशावाद पनि यथार्थवादी विकल्प भएको उनको भनाइ छ। “लोकतन्त्र पचाउन नसक्नेहरू संकीर्ण र असहिष्णु मानसिकताले ग्रसित छन्,” उनले भने।
कार्यक्रमका प्रस्तोता विमल गौतमले मुलुकमा विकासका प्रयासहरू भइरहे पनि जनमानसमा निराशा किन देखिएको हो भन्ने प्रश्न उठाउँदा ओलीले सामाजिक सञ्जाल र युट्युबमा नकारात्मकता फैलाउनेहरूलाई दोषी ठहर गरे। “केही फेसबुक र युट्युबका हल्लावाजहरूले कालो चस्मा लगाएर हेर्ने दृष्टिकोण राखेका छन्, उनीहरूकै कारण मुलुक बदनाम भएको छ,” ओलीको आरोप थियो।
प्रधानमन्त्री ओलीले आफ्नो नेतृत्वमा शुरु गरिएका राष्ट्रिय आयोजना र पूर्वाधार विकासका योजनाहरूलाई तीव्रता दिइएको बताउँदै युवाहरूलाई निराश नहुन र आशावादका साथ देशमै भविष्य खोज्न आग्रह गरे।
