काठमाडौं। काठमाडौंको कोटेश्वरमा शुक्रबार बिहान भएको सवारी दुर्घटनामा एक जनाको मृत्यु भएको छ भने तीन जना घाइते भएका छन्।
मृत्यु हुनेमा नुवाकोट घर भई हाल ललितपुरको धोबीघाटमा बस्दै आएकी २३ वर्षीया नगिना तामाङ रहेकी छन्। उनी पदम थापामगरले चलाएको मोटरसाइकलको पछाडि सवार थिइन्।
दुर्घटनामा मोटरसाइकल चालक २७ वर्षीय पदम थापामगर, भ्यानका चालक रत्न सार्की (शान्तिनगर) र बसकी यात्रु २० वर्षीया मेनुका बुढाथोकी (काँडाघारी) घाइते भएका छन्। उनीहरूको विभिन्न अस्पतालमा उपचार भइरहेको प्रहरीले जनाएको छ।
महानगरीय प्रहरी वृत्त गौशालाका अनुसार दुर्घटना बिहान ६ः३५ बजे भएको हो। बा ३ ख ७०६२ नम्बरको बसले सडकमा रातो बत्तीमा रोकिएका दुई सवारीसाधन — बा प्र ०१-०२६ च २९२७ नम्बरको भ्यान र बा प्र ०२-०५३ प ३८२७ नम्बरको मोटरसाइकल — लाई पछाडिबाट ठक्कर दिएको थियो।
ठक्कर यति तीव्र थियो कि मोटरसाइकलमा सवार नगिना तामाङको घटनास्थलमै मृत्यु भयो। बसको लापरवाहीपूर्ण गति र चालकको असावधानीले दुर्घटना भएको अनुमान गरिएको छ।
घटनापछि बस चालक इलामको सूर्योदय नगरपालिका–५ निवासी ५९ वर्षीय रामकुमार खड्कालाई प्रहरीले नियन्त्रणमा लिएको छ। दुर्घटनाको थप अनुसन्धान भइरहेको प्रहरीले जनाएको छ।
