काठमाडौं । काठमाडौंको प्रदर्शनीमार्गस्थित रत्नराज्य (आरआर) क्याम्पसमा नेपाली कांग्रेसनिकट नेविसंघले तोडफोड गरेका छन् ।
स्ववियुको सर्वसम्मत चयनप्रति असन्तुष्टि जनाउँदै नेविसंघको अर्को पक्षले आज क्याम्पस प्रशासनमा तोडफोड गरेका हुन् ।
उनीहरुले प्रशासनमा रहेको महत्वपूर्ण कागजपत्रदेखि ल्यापटपसम्म फ्याँकेका छन् । साथै कुर्सीहरुसमेत बाहिर ल्याएर तोडफोड गरेको प्रशासनले जनाएको छ । नेविसंघको असन्तुष्ट पक्षले स्ववियुको निर्वाचन सर्वसम्मत नमान्ने र चुनाव गराउनुपर्ने माग छ ।
समिक बडालको चेतावनी-लोकतन्त्रको नाममा अराजकतन्त्र स्वीकार्य छैन। यसैबीच अनेरास्ववियुका अध्यक्ष समिक बडालले आरआरमा सहमति गर्दा नेविसंघले आगो ओकलेको भन्दै टिप्पणी गरेका छन् । यो अहंकार हो कि अनुशासनहीनता,सहमति तपाईंले गर्दा महान,तपाईँले तोकेको आधिकारिक व्यक्तिले गर्दा घृणित ?’, बडालको प्रश्न छ ।
सार्वजनिक सम्पत्तिमा तोडफोड गरेको साथै अरूको सहमतिमा अराजकता फैलाउनेलाई कानूनको कठघरामा उभ्याउनुपर्ने भन्दै अध्यक्ष बडालले लोकतन्त्रको नाममा अराजकतन्त्र अब स्वीकार्य नभएको चेतावनी दिएका छन्।
