ललिता निवास प्रकरणमा संलग्न रहेको आरोपमा पूर्वप्रधानमन्त्रीद्वय माधवकुमार नेपाल र डा. बाबुराम भट्टरायविरुद्ध मुद्दा चलाउने कि नचलाउने भन्ने विषयमा आज सर्वोच्च अदालतको पूर्ण इजलासमा सुनुवाइ हुँदैछ।
प्रधानन्यायाधीश प्रकाशमान सिंह राउतसहित न्यायाधीश टेकप्रसाद ढुंगाना र नित्यानन्द पाण्डे सम्मिलित पूर्ण इजलासमा आजको दिनका लागि मुद्दा पेशीमा परेको हो। यसअघि २०८१ साल चैत्र ७ गते सुनुवाइको मिति तोकिए पनि सो दिन “हेर्न नमिल्ने” मा राखिएको थियो।
वरिष्ठ अधिवक्ता बालकृष्ण न्यौपानेले २०७६ माघ २९ गते दायर गरेको रिटमा पूर्वप्रधानमन्त्री नेपाल र भट्टरायसहित तत्कालीन प्रमुख सचिव लिलामणि पौड्याल, प्रधानमन्त्री तथा मन्त्रिपरिषद् कार्यालय, नेपाल प्रहरीको केन्द्रीय अनुसन्धान ब्यूरो, महान्यायाधीवक्ताको कार्यालय र अख्तियार दुरुपयोग अनुसन्धान आयोगलाई विपक्षी बनाइएको छ। रिटमा उनीहरू सबैविरुद्ध भ्रष्टाचार मुद्दा चलाउन माग गरिएको छ। अख्तियारले उनीहरूविरुद्ध मुद्दा नचलाउने निर्णय गरेपछि रिटमार्फत सो निर्णय बदर गर्न माग गरिएको हो।
पूर्वप्रधानमन्त्री नेपाल र भट्टरायले ललिता निवास क्षेत्रको सरकारी जग्गा व्यक्तिको नाममा सर्न दिने नीतिगत निर्णयमात्रै गरेको भन्दै अख्तियारले उनीहरूमाथि मुद्दा नचाल्ने निर्णय गरेको थियो। तर रिट निवेदकको दावी अनुसार, उक्त निर्णय नै गैरकानुनी ढंगले सार्वजनिक सम्पत्ति निजीकरण गर्न खोजिएको योजनाको हिस्सा हो, र त्यसमा उनीहरूको प्रत्यक्ष भूमिका रहेको छ।
यसअघि न्यायाधीश तिलप्रसाद श्रेष्ठ र नित्यानन्द पाण्डेले उक्त मुद्दा पूर्ण इजलासमा पठाउनुपर्ने आदेश दिएका थिए। अब पूर्ण इजलासको सुनुवाइपछि पूर्वप्रधानमन्त्रीहरूविरुद्ध मुद्दा अगाडि बढ्ने कि नचल्ने भन्ने कुराको अन्तिम निर्णय हुनेछ।
