गण्डकी प्रदेशका पूर्वमन्त्री तथा सांसद दीपक मनाङे (राजीव गुरुङ) २७ कात्तिकदेखि डिल्लीबजार कारागारमा बन्दी जीवन बिताइरहेका छन् । कारागारको गोलघरभित्र ‘ख’ ब्लकमा रहेका मनाङे बिन्दास देखिन्छन् ।
ज्यान मार्ने उद्योगमा सजाय भुक्तान गर्न डिल्लीबजार कारागार चलान भएका मनाङले दुई साता बित्दासम्म न कारागार प्रशासनसँग कुनै गुनासो गरेका छन् न भेट्न आउनेसँग ।
ज्यान उद्योगमा उच्च अदालत पाटनले गरेको ५ वर्ष कैद फैसलालाई सर्वोच्च अदालतले समेत गत कात्तिक २० गते सदर गरेपछि मनाङे पक्राउ परेका थिए । त्यसपछि उनलाई कात्तिक २७ गते डिल्लीबजार कारागार चलान गरिएको थियो ।
कारागार पुगेपछि उनले जेलर पूर्णबहादुर खत्रीलाई भेटेर ‘ख’ ब्लकमा बस्ने व्यवस्था मिलाइदिन आग्रह गरेका थिए । यसअघि पनि ‘ख’ ब्लकमै बसेका र पूर्वमन्त्री समेत रहेकाले मनाङेको अनुरोधलाई स्वीकार्दै कारागार प्रशासनले उनले भनेबमोजिम नै बस्ने व्यवस्था गर्दिएको छ ।
मनाङेलाई २७ कात्तिकमा प्रहरीको केन्द्रीय अनुसन्धान ब्यूरो (सीआईबी)ले काठमाडौंको सानो भर्याङस्थित कम्फर्ट हाउजिङबाट पक्राउ गरेर कारागार चलान गरेको थियो ।
सोही ज्यान मुद्दामा यसअघि २ वर्ष ८ महिना जेल बसिसकेकाले मनाङेले अब २ वर्ष ४ महिना कैद भुक्तान गर्न बाँकी छ । सोही कैद भुक्तानका लागि उनी डिल्लीबजार कारागारमा छन् ।
यो पनि हेर्नुसहोस् :
सहकारीमा विश्वासघात गरेको अभियोग दर्ता भएपछि फरार प्रतिवादी खोज्न हिँडेको प्रहरीले आफ्नै सङ्गठनका बहालवाला प्रहरी निरीक्षक फेला पार्यो। एक वर्ष अगाडिबाट ती प्रहरी निरीक्षकलाई जुन प्रहरी कार्यालयले खोजिरहेको थियो उनी त्यहीँ कार्यरत थिए।
उनी हुन् स्वयम्भू वृत्तका प्रहरी निरीक्षक धर्मेन्द्र अकौलिया। मारुती बचत तथा ऋण सहकारीलाई विश्वासघात गरेको भन्दै उनको नाममा प्रहरी वृत्त स्वयम्भूमै २०८० भदौमा जाहेरी दर्ता भएको थियो। तर उनी फेला परेका थिएनन्।
फरार रहेका उनको स्थायी ठेगाना धादिङ जिल्ला, धुनिवेशी नगरपालिका वडा नम्बर-५ थियो। प्रहरीमा जाहेरी परेपछि अनुसन्धान सकायो। तर उनी पक्राउ परेनन्। प्रहरीले २०८१ साउनमा अनुसन्धान सक्काएर प्रस्तावित राय र सुझाव बुझाए अनुसार सरकारी वकिल कार्यालयले मुद्दा दायर गर्यो।
यो बिचमा अकौलिया २०८१ भदौ २७ मा स्वयम्भू वृत्तमा सरुवा भएर आए। उनी सहकारीको सञ्चालक समिति सदस्य समेत थिए। आफ्नै कार्यालयले फरार रहेको भन्दै लगेको मुद्दाका फरार प्रतिवादी आफ्नै कार्यालयमा रहेको खुलेपछि स्वयम्भू वृत्तका डिएसपी उद्धव सिंह भाटले जिल्ला प्रहरी परिसर काठमाडौँका प्रमुखलाई सूचना दिए।
उनले उपत्यका प्रहरी कार्यालयसँग परामर्श गरेपछि मंसिर ४ मा पक्राउ गरेर काठमाडौँ जिल्ला अदालतमा बुझाइयो। अदालतमा बुझाएपछि उनी एक लाख धरौटीमा रिहा भए। यता प्रहरीमा भने उनी निलम्बन रहे।
