नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ ले फागुन २१ को प्रतिनिधि सभा निर्वाचनपछि पार्टीभित्रैबाट असहयोग भएको संकेत गर्दै गम्भीर असन्तुष्टि व्यक्त गरेका छन्। पार्टी कार्यालय पेरिसडाँडामा आयोजित जनवर्गीय संगठनका नेताहरूको बैठकलाई सम्बोधन गर्दै उनले आफ्नै केन्द्रीय सदस्य र प्रदेश तहका नेताहरूले पार्टी उम्मेदवारलाई भोट नहालेको रिपोर्ट आएको बताए।
उनका अनुसार करिब ५० प्रतिशत भोट राष्ट्रिय स्वतन्त्र पार्टी (रास्वपा) को चुनाव चिह्न “घण्टी” मा गएको ‘जनरल रिपोर्ट’ प्राप्त भएको छ। उनले स्पष्ट रूपमा निर्देशन दिँदै भने— को-को नेताहरू आफ्नो क्षेत्रमा गएनन्, कसले भोट हालेनन्, र कसले घण्टीमा मत दिए, त्यसको ठोस विवरण अनिवार्य रूपमा उपलब्ध गराउनुपर्छ। त्यस्ता व्यक्तिमाथि कडा कारबाही गरिने चेतावनी पनि उनले दिए।
प्रचण्डका अनुसार कारबाहीको प्रक्रिया केन्द्रीय सदस्यहरूबाटै सुरु हुनेछ। “पार्टी निर्माण गर्न अनुशासन अपरिहार्य छ,” उनले भने, “निर्वाचनको समयमा पार्टीभन्दा बाहिर जाने प्रवृत्तिलाई अब सहन सकिँदैन।” उनले पार्टी पुनर्गठनको सुरुवात पनि यहीँबाट हुने उल्लेख गर्दै विचार, राजनीति र संगठनलाई नयाँ ढंगले सुदृढ बनाउनुपर्नेमा जोड दिए।
निर्वाचन परिणामले पार्टीलाई ठूलो झट्का दिएको छ। रास्वपाले प्रत्यक्षतर्फ १२५ सिट जित्दा नेपाली कम्युनिस्ट पार्टी ८ सिटमा सीमित भयो। यसले पार्टीभित्र आत्मसमीक्षा र सुधारको आवश्यकता औँल्याएको छ। पार्टीले तल्लो कमिटीसम्म सर्कुलर जारी गरी समीक्षा रिपोर्ट संकलन गरिरहेको छ, जसमा आफ्नै कार्यकर्ताबाट अपेक्षित समर्थन नपाएको निष्कर्ष व्यापक रूपमा आएको छ।
प्रचण्डले विकास, पैसा वा प्रचार मात्रले चुनाव जित्न नसकिने तर्क पनि प्रस्तुत गरे। उनका अनुसार मुख्य कुरा विचार, राजनीति र निरन्तर सङ्घर्ष हो। “हामी विचार र मुद्दामा अझै बलियो छौँ,” उनले भने, “तर सङ्घर्षमा केही पछि परेका कारण यस्तो परिणाम आएको हो।”
उनले पार्टीलाई चुस्त, अनुशासित र विचारमा स्पष्ट बनाउँदै पुनः सशक्त रूपमा अगाडि बढ्ने प्रतिबद्धता व्यक्त गरे।
