काठमाडौं — तारकेश्वर नगरपालिका को आयोजनामा आगामी २०८२ साल चैत्र ४ गते बुधबार पर्ने घोडेजात्रा पर्वको अवसरमा “तारकेश्वर घोडेजात्रा महोत्सव” आयोजना गरिने भएको छ।
नेपाली सेनाबाहेक नागरिकस्तरबाट आयोजना हुन गइरहेको यो महोत्सवलाई विशेष तथा ऐतिहासिक कार्यक्रमका रूपमा सञ्चालन गरिने जनाइएको छ। परम्परागत रूपमा टुँडिखेल मा मात्र सीमित रहँदै आएको घोडेजात्रा पर्वलाई यसपटक तारकेश्वरमा विस्तार गर्दै नयाँ अभ्यासको थालनी गर्न लागिएको नगरपालिकाले जनाएको छ।
“पहिचान, अपनत्व र अधिकारसहित दिगो विकास” भन्ने नाराका साथ आयोजना हुन लागेको यस महोत्सवले तारकेश्वर नगरवासीसहित विभिन्न समुदायका नागरिकलाई सहभागितामूलक रूपमा मनोरञ्जन प्रदान गर्नुका साथै सांस्कृतिक एकता, आपसी सद्भाव र सामाजिक समन्वय अभिवृद्धि गर्न महत्वपूर्ण योगदान पुग्ने विश्वास लिइएको छ।
महोत्सवमा देशभरका १८ वटा पालिकाका प्रमुखहरूको उपस्थिति रहने बताइएको छ। साथै तारकेश्वर नगरपालिकाभित्रका सर्वसाधारण नागरिक, नागरिक समाजका प्रतिनिधि, विभिन्न राजनीतिक दलका प्रतिनिधि, कर्मचारी तथा अन्य सरोकारवालाहरूको उल्लेखनीय सहभागिता रहनेछ।
कार्यक्रममा १८ वटा घोडाको आकर्षक प्रस्तुति रहनेछ भने महोत्सव सञ्चालनमा एप्रेष्ट हर्स एन्ड बगी प्रालि को सहयोग रहने जानकारी नगर प्रमुख कृष्ण हरि महर्जन ले दिनुभएको छ।
उक्त “तारकेश्वर घोडेजात्रा महोत्सव” २०८२ साल चैत्र ४ गते बुधबार दिनको २:०० बजेदेखि तारकेश्वर नगरपालिका वडा नं. ८ स्थित पिपलडाँडा खेलमैदानमा सम्पन्न हुने जनाइएको छ।
