पूर्वप्रधानमन्त्री तथा नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले आफ्नो उमेर र सक्रियतामाथि प्रश्न उठाउनेलाई कडा चुनौती दिएका छन् । सोमबार विराटनगरमा आयोजित पार्टी एकता सन्देश सभालाई सम्बोधन गर्दै प्रचण्डले आफू युवाहरूसँग प्रतिस्पर्धा गर्न शारीरिक र मानसिक रूपमा पूर्ण तयार रहेको दाबी गरेका हुन् ।
आफ्नो सम्बोधनको अन्त्यमा प्रचण्डले भने, ‘मसँग दौडिने कोही छ ? मर्निङ वाक कति गर्ने हो, म तयार छु । हेभी एक्सर्साइज कति गर्ने हो, म युवाहरूसँग गर्न चाहेको छु ।’उनले आफूलाई बुढो भयो भनेर टिप्पणी गर्नेलाई ‘भुईंफुट्टा, इतिहासविहीन र विचारविहीन’को संज्ञा दिए । प्रचण्डले १६ वटा पार्टी मिलेर बनेको नयाँ कम्युनिस्ट शक्तिले नै अब मुलुकमा वैज्ञानिक समाजवाद, आर्थिक समृद्धि र रोजगारीको नेतृत्व गर्ने दाबी समेत गरे ।
प्रचण्डले मुलुकको राष्ट्रिय स्वाधीनताको रक्षाका लागि अब सेना र प्रहरीको भर मात्र पर्न नहुने बताए । विदेशी हस्तक्षेप र राष्ट्रिय संकटको सामना गर्न ३ करोड नेपाली जनताकै ‘राष्ट्रिय फौज’ तयार गर्नुपर्ने उनको भनाइ छ ।
‘हाम्रो सेनाले सायद चाहेर पनि हाम्रा ऐतिहासिक धरोहर बचाउन सकेन । राष्ट्रिय स्वाधीनताको रक्षाका लागि सेना वा प्रहरीले मात्र पुग्दो रहेनछ,’ प्रचण्डले भने, ‘अहिले तत्काल ठूला शक्ति राष्ट्रहरूसँग लड्नका लागि मिसाइल वा अत्याधुनिक हतियार बनाउन सक्ने तागत हामीसँग छैन । तर, ३ करोड नेपाली जनताको राष्ट्रिय फौज बनाउन सक्ने तागत छ । यदि त्यस्तो भयो भने दुनियाँको कुनै पनि शक्तिले नेपाललाई हराउन सक्दैन ।’
सम्बोधनका क्रममा प्रचण्डले भदौ २४ गते ऐतिहासिक धरोहरहरू जलेर ध्वस्त भएको घटनालाई ‘असाधारण संकट’को संज्ञा दिए । उनले त्यसबेला देश झन्डै दुई दिनसम्म राज्यविहीनताको अवस्थामा पुगेको र राजा फर्किने वा सेनाले सत्ता लिने जस्तो सन्त्रास फैलिएको स्मरण गरे ।
‘त्यो विध्वंस र षड्यन्त्रले नेपाल असाधारण संकटमा गयो । त्यसको साक्षी म र माधवकुमार नेपाल थियौं,’ उनले थपे, ‘अहिले पनि राष्ट्र संकटमुक्त भइसकेको छैन ।’
युवा पुस्ताको विद्रोहले आफूहरूलाई आत्मसमीक्षा गर्न र गल्ती महसुस गर्न बाध्य बनाएको उनको भनाइ थियो ।
‘विचार बुढो र तन्नेरी हुँदैन । हामी धेरै पछि परिसकेका छौं, अब छोराछोरी र नातिनातिना पुस्तासँग सिक्न तयार हुनुपर्छ,’ प्रचण्डले भने, ‘सबै आफैंले जानेजस्तो नगरौं । अहिले जेनजीहरूले हाम्रो अभिभावक नेपाली कम्युनिस्ट पार्टी नै हो भन्दै प्रवेश गरिरहेका छन् ।’
प्रचण्डले वर्तमान सरकारलाई चुनावी सरकारको हैसियतमा मात्र रहन चेतावनी पनि दिए । चुनावको म्यान्डेट पाइसकेको सरकारले दीर्घकालीन असर पर्ने सन्धि सम्झौता गर्न नहुने उनको भनाइ छ ।
‘यो सरकारका मन्त्रीहरूले दीर्घकालीन खालका सन्धि सम्झौता अगाडि बढाउँछन् भने त्यो म्यान्डेट विपरीत हुन्छ,’ प्रचण्डले भने, ‘हामी चुनावमा होमिइसक्यौं । सरकारले स्वच्छ र निष्पक्ष निर्वाचनको वातावरण बनाओस् ।’
