मंसिरमा एमालेले विघटित प्रतिनिधिसभाका सदस्यहरूसँग गरेको छलफलमा अध्यक्ष केपी शर्मा ओलीले प्रतिनिधिसभा विघटनदेखि नयाँ सरकार गठनसम्मका सबै प्रक्रियालाई ‘संविधानविरुद्ध, अलोकतान्त्रिक र नियोजित सत्ता कब्जा’ को परिणाम रहेको आरोप लगाएका छन्। उनले मुलुकमा उत्पन्न संवैधानिक सङ्कटलाई ‘साधारण चुनावी बहस’ मा रूपान्तरण गरिएको भन्दै तीव्र आक्रोश व्यक्त गरे।
शनिबार काठमाडौंमा आयोजित पार्टीसभा सम्बोधन गर्दै ओलीले वर्तमान सरकारले चुनाव गराउने वैधानिकता नै नभएको दाबी गरे। प्रधानमन्त्री सुशीला कार्कीलाई लक्षित गर्दै उनले भने, “तपाईंलाई चुनाव गराउने अधिकार पनि छैन। अवैधानिक सरकारले वैधानिक चुनाव गराउन सक्दैन।” उनका अनुसार जनताबाट निर्वाचित प्रतिनिधिमार्फत बन्नुपर्ने सरकार अनुचित ढंगले गठन भएकाले यस्तो सरकारले आगामी फागुन २१ को निर्वाचन गराउन सक्ने अवस्था नै छैन।
ओलीले कांग्रेस संसद पुनर्स्थापनाको पक्षमा उभिने अपेक्षा व्यक्त गरे पनि एमालेको सभा सकिँदा–नसकिँदै कांग्रेसले लामो छलफलपछि चुनावमै जाने निर्णय गर्यो। यससँगै चुनावको विपक्षमा एमाले एक्लिँदै गएको छ। अन्य दल चुनाव तयारीमा लागिसके पनि कांग्रेस मात्र अनिर्णितजस्तै देखिँदै आएको थियो।
जेन–जी आन्दोलनपछि रक्षात्मक बनेको एमालेले असोजको केन्द्रीय समितिबाट संसद पुनर्स्थापना असंवैधानिक ठहर गरिसकेको थियो। त्यसपछि देशव्यापी गतिविधि, शक्ति प्रदर्शन र संगठन सुदृढीकरणमा केन्द्रित पार्टी अहिले पनि चुनाव नहुने अडान दोहोर्याइरहे पनि आन्तरिक रूपमा संरचना कडा बनाउने काम जारी राखेको नेताहरू बताउँछन्। एक केन्द्रीय सदस्यका अनुसार २३–२४ भदौको आन्दोलनपछि कार्यकर्ताको खस्किएको साख उठाउन दलीय गतिविधि तीव्र बनाइएको हो।
३२ विभागमार्फत दल दर्तादेखि अद्यावधिक कार्य अगाडि बढिरहेको निर्वाचन विभाग प्रमुख निरज आचार्यले जानकारी दिएका छन्। आयोगले दिएको म्यादभित्र दल दर्ता हुने उनले बताए। तर वर्तमान सरकारले चुनाव नगराउने दाबी दोहोर्याउँदै उनले एमाले ‘अवैधानिक प्रक्रियामा’ नतर्सिने स्पष्ट पारे।
आचार्यका अनुसार नेताहरूको राहदानी रोक्का, स्थानहद, बारामा एमाले नेताहरूलाई उडानमा रोक लगाइएको घटना, जेन–जी ब्यानरमार्फत अपराधी परिचालनजस्ता गतिविधिले स्वतन्त्र राजनीतिक क्रियाकलापमा बाधा पुगेको छ। सुरक्षा कमजोर, भागेका कैदी नपुगेको र सुरक्षाकर्मीको मनोबल गिरिरहेको कारण पनि चुनाव वातावरण नबनेको उनको भनाइ छ।
एमालेले मुलुकलाई वैधानिक मार्गमा ल्याउने एकमात्र उपाय संसद पुनर्स्थापना रहेको अडान दोहोर्याएको छ। पार्टीको दाबी अनुसार अन्ततः अन्य दल पनि यही निर्णयतर्फ आउनेछन्।
