राष्ट्रिय स्वतन्त्र पार्टी (रास्वपा) की सहमहामन्त्री सुमना श्रेष्ठले अन्ततः पदबाट राजीनामा दिएकी छन्। तर यो राजीनामा केवल पदत्यागको विषय होइन । यो घटना रास्वपाभित्रको आन्तरिक द्वन्द्व, नेतृत्वको असहज सम्बन्ध र मतभेदको उदाङ्गोपना हो ।
श्रेष्ठले उच्च अदालत तुलसीपुरको बुटवल इजलासले सभापति रवि लामिछानेलाई पुर्पक्षका लागि थुनामा पठाउने आदेश दिनुअघि नै राजीनामा दिइसकेकी थिइन्।उनले प्रत्यक्ष रूपमा सभापति लामिछानेलाई सम्बोधन गर्दै राजीनामा बुझाएकी थिइन् र स्वीकृतिको माग गरेकी थिइन्।
तर पार्टीले चैत २३ गतेदेखि सुरु गर्न लागेको ‘जनयात्रा’लाई कारण देखाउँदै राजीनामा रोक्न प्रयास गरेको थियो। तर सुमना आफ्नो अडानमा अडिग रहिन्। अन्ततः आज वैशाख ४ गते उनको राजीनामा सार्वजनिक भयो, जसलाई लिएर उनले “गलत समयमा मिडियामा राजीनामालाई बाहिर ल्याइएको ” भन्दै असतुष्टि ब्यक्त गरिन् ।
श्रेष्ठले राजीनामा पछिको संवादमा पार्टीमा “संस्थाभन्दा व्यक्ति हाबी” भएको आरोप लगाइन्। उनले नेतृत्व परिवर्तनको आवश्यकता औँल्याउँदै, “मूल्य मान्यताको आधारमा रिफर्म आवश्यक छ” भनिन्। पार्टीभित्रको आन्तरिक प्रक्रिया, पारदर्शिता र सहकार्यको अभावप्रति उनको असन्तुष्टि खुलेर बाहिर आएको छ। “दलहरूले काम गर्न नसक्नुको कारण संसद् र पार्टीमा ब्यक्ति हाबी हुनु हो। यसले नीति होइन, व्यक्ति केन्द्रित राजनीति जन्माउँछ।” उनले स्पष्ट भनिन्
सुमनाले एक अन्तर्वार्तामा रवि लामिछानेबारे ‘पास’ भन्दै दिएका संकेतहरूले उनीहरूको सम्बन्ध सामान्य नरहेको पुष्टि गर्छ। उनले स्पष्ट भनिन् “व्यक्ति वा पार्टीको झोले बन्नु छैन, देशको झोले बन्ने हो।” यस्तो टिप्पणीले पार्टी नेतृत्वप्रति आलोचनात्मक कटा झल्किन्छ। पार्टीभित्र यस्ता आलोचना गर्दा केही नेताहरूले उल्टै सुमनाको आचरणमाथि प्रश्न उठाए । उनी शिक्षा मन्त्री हुँदा तीन पद (मन्त्री, सांसद र सहमहामन्त्री) सम्हालेको आरोप लगाउँदै अहिलेको ‘एक व्यक्ति, एक पद’ को अडान दोहोरो चरित्र भएको भन्दै उनको आलोचना गरियो ।
तरिकालको फुट र आन्तरिक कलहले रास्वपाको नेतृत्व धरापमा पर्ने होईन ? जनमानसमा प्रश्न उठ्न थालेको छ ।
