रसुवागढी। रसुवामा बाढीले आतंक मच्चाएको छ,जसले ठूलो मात्रामा धनजनको क्षति पुर्याएको छ। अहिले रसुवामा बाढीले पुर्याएको क्षतिको विवरण संकलन गर्न समिति गठन गरिएको छ। बुधबार प्रमुख जिल्ला अधिकारी अर्जुन पौडेलको अध्यक्षतामा बसेको जिल्ला सुरक्षा समिति र विपद् व्यवस्थापन समितिको संयुक्त बैठकले समिति गठन गरेको हो।
गल्छी–त्रिशूली–मैलुङ–स्याफ्रुबेँसी–रसुवागढी सडक योजनाका प्रमुख इन्जिनियर खड्गलाल श्रेष्ठको संयोजकत्वमा १३ सदस्यीय समिति गठन गरिएको छ। यस समितिले विपद् प्रभावित क्षेत्रमा भएको भौतिक क्षतिको प्रारम्भिक विवरण संकलन गरी यथाशीघ्र प्रतिवेदन पेस गर्ने जिम्मेवारी पाएको छ।
समितिमा रसुवा भन्सार कार्यालयका प्रमुख भन्सार अधिकृत तुलसीप्रसाद भट्टराई, यान्त्रिक कार्यालयका प्रमुख ई. विजय हाछेथु, सघन सहरी तथा भवन निर्माण आयोजनाका आयोजना प्रमुख ई. शसिन्द्र घिमिरे, उत्तरगया गाउँपालिकाका प्रमुख प्रशासकीय अधिकृत होमनाथ दाहाल, गोसाइँकुण्ड–२ का वडाध्यक्ष कामी छिरिङ तामाङ सदस्य रहेका छन्।
त्यस्तै, नेपाल विद्युत प्राधिकरण रसुवा वितरण केन्द्रका प्रमुख गुञ्जमान तामाङ, नेपाल टेलिकम रसुवाका प्रमुख नारायणराज श्रेष्ठ, रसुवागढी जलविद्युत कम्पनीका प्रमुख सत्यराम ज्याख्वा, चिलिमे जलविद्युत कम्पनीका प्रमुख मनिष विष्ट, नेपाल इन्टरमोडल यातायात विकास समितिका इन्जिनियर शोभाकान्त राउत र नेपाल हिमालय सीमापार वाणिज्य संघका वरिष्ठ उपाध्यक्ष गंगबहादुर घिमिरे सदस्य रहेका छन्। सहायक प्रमुख जिल्ला अधिकारी ध्रुव प्रसाद अधिकारी समितिका सदस्य सचिव रहेका छन्।
बैठकले यस समितिलाई आवश्यक सहयोग, निर्देशन, समन्वय र सहजीकरण गर्न जिल्ला सुरक्षा समितिले साथ दिने निर्णयसमेत गरेको छ।
चीनतर्फबाट आएको बाढीले गोसाइँकुण्ड गाउँपालिका–२ स्थित रसुवागढी क्षेत्रमा वितण्डा मच्चाउँदा टिमुरे भन्सार क्षेत्र पूर्ण रूपमा ध्वस्त भएको छ। नेपाल प्रहरीका अनुसार रसुवामा गएको बाढीमा परेकामध्ये ९ जनाको शव फेला परेको छ। प्रहरी प्रधान कार्यालयले उपलब्ध गराएको पछिल्लो विवरणअनुसार अझै १९ जना बेपत्ता रहेका छन्, जसमा २ जना प्रहरी, ६ जना चिनियाँ नागरिक र ११ जना सर्वसाधारण छन्।
यस्तै, ५७ जनाको उद्धार भएको विवरणमा उल्लेख छ। उद्धार कार्यका लागि ३८३ जना प्रहरी टोली परिचालित गरिएको थियो।
बाढीले नेपाल–चीन सीमा क्षेत्रको मितेरी पुल, २४ वटा कन्टेनर, ६ वटा ट्रक र ३५ वटा इभी गाडी बगाएको छ। स्याफ्रुबेँसीदेखि टिमुरे जाने सडकसमेत पूर्ण रूपमा अवरुद्ध भएको छ। रसुवागढी हाइड्रोको ड्याम र भन्सार कार्यालय रसुवाको यार्डमा समेत क्षति पुगेको विवरण प्राप्त भएको छ।
