दोस्रोपटक संयुक्त राष्ट्र अमेरिकाका पूर्वराष्ट्रपति डोनाल्ड ट्रम्प पुनः एकपटक ‘प्रेसिडेन्ट’ बन्न तम्सिएका छन् । ट्रम्पले यसअघि सन् २०१७ देखि २०२१ सम्म अमेरिकी राष्ट्रपतिको भूमिका निर्वाह गरिसकेका छन् ।
२०२१ मा राष्ट्रपतिको उम्मेदवार बनेर डेमोक्रेटिक पार्टीका उम्मेदवार जो बाइडेनसँग पराजित बनेका ट्रम्प पुनः उम्मेदवार बनेका हुन् । सन् २०१६ मा भएको राष्ट्रपतीय चुनावमा रिपब्लिकन पार्टीका ट्रम्पले डेमोक्रेटिक पार्टीकै हिलारी क्लिन्टनमाथि जित हाँसिल गरेका थिए ।
अब, आगामी नोभेम्बरमा हुने चुनावमा पनि महिला उम्मेदवारलाई हराएर दोस्रो राष्ट्रपतिमा दोस्रो कार्यकाल बिताउने योजनामा छन्, ट्रम्प । उमेरले ७८ वर्ष पुगेका ट्रम्पले आफूभन्दा १९ वर्ष कान्छी कमला ह्यारिसलाई प्रतिद्वन्द्वीका रूपमा पाएका छन् ।
राष्ट्रपति जो बाइडेन पछाडि हटेपछि वर्तमान उपराष्ट्रपतिसमेत रहेकी ह्यारिस ट्रम्पसँग चुनावी मैदानमा होमिन आँटेकी हुन् । डेमोक्रेटिक पार्टीकी उम्मेदवार ह्यारिस पूर्वराष्ट्रपतिद्वय बाइडेन र बाराक ओबामाको साथ र समर्थनले हौसिएकी छन् ।
ट्रम्पले पनि अमेरिकाको राष्ट्रपतिका लागि स्वतन्त्र उम्मेदवार रोबर्ट एफ केनेडी जुनियरको साथ पाउने भएका छन् । उनी अमेरिकी सिनेटर रोबर्ट एफ केनेडीका छोरा र पूर्वराष्ट्रपति जोन एफ केनेडीका भतिजा हुन् । शुक्रबार अमेरिकाको एरिजोनामा आयोजित चुनावी ¥यालीमा एउटै मञ्च साझा गर्दै केनेडीले ट्रम्पलाई समर्थन गर्दै आफ्नो उम्मेदवारी फिर्ता लिएको घोषणा गरे ।
यसअघि ह्यारिसले केनेडीको समर्थकबाट पनि भोट प्राउन प्रयास गर्ने बताएकी थिइन् । शुक्रबार नै सिकागोमा भएको चुनावी सम्बोधनमा ह्यारिसले राष्ट्रपतिको उम्मेदवारी स्वीकार गर्दै ट्रम्पलाई मतदान नगर्न अपील गरेकी थिइन् । तर, केनेडीले ट्रम्पलाई समर्थन गर्न आफ्नो उम्मेदवारी फिर्ता लिएको घोषणा गरेका हुन् ।
केनेडीको समर्थनले ट्रम्पमा केही आशा थपिएको छ । तथापि, अमेरिकी राष्ट्रपतिमा लगातार दुईपटक बाजी मारेका ओबामा र वर्तमान राष्ट्रपति बाइडेन ह्यारिसलाई जिताउन खटिइरहँदा यसपटक अमेरिकाले महिला राष्ट्रपति पाउला कि ! भन्ने अनुमान गर्न सकिन्छ ।
ह्यारिसले विजयको झण्डा फहराइन भने उनी अमेरिकी इतिहासमा पहिलो महिला राष्ट्रपति बन्ने छिन् । साथै विश्व शक्ति राष्ट्र अमेरिकाको नेतृत्व पहिलो पटक महिलाले गर्ने छिन् । तथापि, ह्यारिस र डोनाल्ड ट्रम्पबीचको प्रतिस्पर्धा कठिन हुने अनुमान गरिँदैछ ।
अराजक स्वभाव भएको भन्ने आक्षेप लाग्नेगरेका ट्रम्पलाई कतिपय कुरामा आफ्नो बोली नै गलपासो लाग्ने गरेको छ । यसअघि क्लिन्टनसँग चुनावी प्रतिस्पर्धा गर्नुअगाडि ट्रम्पले पराजित भएमा चुनावको नतिजा स्वीकार नगर्ने बताएका थिए । त्यो बेला हिलारीले ट्रम्पको अभिव्यक्तिलाई अमेरिकन प्रजातन्त्रमाथिको आक्रमणका रूपमा व्याख्या गरेकी थिइन् ।
तर, बाइडेनसँगको पराजयपछि भने उनले शान्तिपूर्ण रूपमा सत्ता हस्तान्तरण गरेनन् । उनले बाइडेनलाई राष्ट्रपतिका रुपमा स्वीकार्न समेत निक्कै समय लगाएका थिए । बरु, निर्वाचनको परिणामविरुद्ध भने लडाइँ लडिरहे । निर्वाचनमा धाँधली भएको भन्दै रुष्ट व्यवहार देखाएका ट्रम्पको व्यवहारलाई लिएर कतिपय अमेरिकी रिपब्लिकन पार्टीकै नेताहरू पनि खुशी थिएनन् ।
