काठमाडाैं । नेपाली कांग्रेसका सांसद रामहरि खतिवडा प्रतिनिधि सभाको हिउँदे अधिवेशनका सबै बैठकमा उपस्थित हुनु भएको छ । कांग्रेस केन्द्रीय सदस्यसमेत रहेका खतिवडा पुस २५ गते शुरू भइ वैशाख १५ गतेसम्म चलेको पहिलो अधिवेशनका सबै बैठकमा उपस्थित भएको संसद् सचिवालयले जनाएको छ ।
पुस महिनाका २, माघ महिनामा ७, फागुनमा ४, चैत्रमा ९ र वैशाखमा ६ वटा बैठकमा खतिवडा उपस्थित हुनु भएको छ । संसदमा नियमित उपस्थित हुने र संसदीय कर्ममा सहभागी हुनुलाई दायित्व सम्झेको उहाँले बताउनु भयो । ‘संसद्का सबै बैठकमा उपस्थित हुने र जनताको आवाज बोल्ने मेरो प्रयास रहने छ, पार्टीका अन्य काम मिलाएर पनि संसद्मा नियमित उपस्थित हुने गरेको छु’ खतिवडाले भन्नु भयो ।
प्रतिनिधि सभामा कार्यव्यवस्था परामर्श समितिको सदस्यसमेत रहनु भएका खतिवडाले अधिवेशन अन्त्यको दिनमा सांसदको बिदा स्वीकृतसँगै नियमित उपस्थित हुनेको नाम सार्वजनिक गर्न उहाँले प्रस्ताव गर्नु भएको छ । ‘संसदको बैठकमा कोरम नपुगेको दिन टेलिभिजनले हामी उपस्थितको अनुहार देखाउँछ, उपस्थित रहेका सांसद लज्जित हुनुपर्ने अवस्था छ’ खतिवडाले भन्नु भयो ।
अधिवेशनको शुरूमै खतिवडाले नेकपा एमालेका फरार सांसद लक्ष्मी महतो कोइरीको बारेमा प्रश्न उठाउनु भएको थियो । कोइरीको विषयलाई उहाँले संसद्मा निरन्तर उठाईरहनु भएको थियो ।
